Atlot Andans

Margir eiga erfitt að átta sig á hvítasunnunni. Atburðum hennar er lýst í öðrum kapítula Postulasögunnar (2, 1 - 13):

 "Þá er upp var runninn hvítasunnudagur, voru þeir allir saman komnir. Varð þá skyndilega gnýr af himni eins og aðdynjanda sterkviðris og fyllti allt húsið, þar sem þeir voru. Þeim birtust tungur, eins og af eldi væru, er kvísluðust og settust á hvern og einn þeirra. Þeir fylltust allir heilögum anda og tóku að tala öðrum tungum, eins og andinn gaf þeim að mæla.

Í Jerúsalem dvöldust Gyðingar, guðræknir menn, frá öllum löndum undir himninum. Er þetta hljóð heyrðist, dreif að fjölda manns. Þeim brá mjög við, því að hver og einn heyrði þá mæla á sína tungu. Þeir voru frá sér af undrun og sögðu: "Eru þetta ekki allt Galíleumenn, sem hér eru að tala? Hvernig má það vera, að vér, hver og einn, heyrum þá tala vort eigið móðurmál? Vér erum Partar, Medar og Elamítar, vér erum frá Mesópótamíu, Júdeu, Kappadókíu, Pontus og Asíu, frá Frýgíu og Pamfýlíu, Egyptalandi og Líbýubyggðum við Kýrene, og vér, sem hingað erum fluttir frá Róm. Hér eru bæði Gyðingar og þeir sem tekið hafa trú Gyðinga, Kríteyingar og Arabar. Vér heyrum þá tala á vorum tungum um stórmerki Guðs. Þeir voru allir furðu lostnir og ráðalausir og sögðu hver við annan: "Hvað getur þetta verið?"

En aðrir höfðu að spotti og sögðu: "Þeir eru drukknir af sætu víni.""

Þetta er undursamleg saga. Þar segir frá gný af himni, aðdynjanda sterkviðris, en þannig er Andanum lýst á hebresku. Þar heitir hann "rúakh" sem þýðir líka vindur og andardráttur. Þannig er Andi Guðs. Hann er eins og loftið í kringum okkur og loftið í lungunum.

Hvítasunnan, hátíð Andans, er í nánum tengslum við hina glöðu vorvinda og þann tíma ársins þegar lífið kviknar allt um kring. Þess vegna er hvítasunnan hátíð hins frjóvgandi og skapandi máttar. Í gömlum latneskum sálmi er Andinn beinlínis nefndur Sköpunarandi ("Veni Creator Spiritus").

Hvítasunnan er hátíð hins skapandi manns sem er frjóvgaður af Anda Guðs. Hvítasunnan er einnig hátíð Andans sem byggir brýr milli fólks og þjóða. Andi hvítasunnunnar er samfélagsandinn. Hann sprengir af sér ramma tungumála og landamæra. Andinn er að því leyti eins og tónlistin.

Hvítasunnan er undursamleg hátíð.

Athugasemdir

[Jóna Á. Gísladóttir, 28.5.2007 kl. 11:44]

Andi hvítasunnunnar er samfélagsandinn..... I like that.

[Árni Svanur Daníelsson, 28.5.2007 kl. 11:56]

Takk fyrir þennan fína pistil. Ég krækti í hann á trú.is.

[Guðrún Sæmundsdóttir, 30.5.2007 kl. 12:34]

það sem er það besta við Andann er að hann stendur okkur öllum til boða, hann talar ekki af sjálfum sér heldur er hann hjálparinn sem Jesús sendi öllum þeim sem biðja til hans og lifa samkvæmt því sem hann boðaði, en það er auðvelt að nálgast Jesú í nýja testamentinu.

[Lára Stefánsdóttir, 31.5.2007 kl. 23:10]

Þetta er mjög góð saga en ég velti fyrir mér hvernig fjölmiðlar myndu fjalla um atburð sem þennan ef hann gerðist í dag? Hvaða áhrif myndi hann hafa á fólk?

[Guðrún Sæmundsdóttir, 1.6.2007 kl. 06:04]

Lára, úthelling andans á sér stað á hverjum einasta degi! en þarna var hjálparinn heilagur andi að mæta í postulunum í fyrsta sinn, svo að mikið hefur gengið á. Ef þig fýsir að ganga í samfélag við andann heilaga þá mæli ég með lestri á nýja testamentinu og sterku bænalífi.