Þrjú hugtök

Yfir vikulegum grjónagraut í foreldrahúsum spunnust umræður um hugtakið "alúðarfrekja".

Alúðarfrekjur eru svo elskulegar og kurteisar að áður en maður veit af er maður búinn að gefa þeim næstu mánaðarlaun sín.

Alúðarfrekjur ná sínu fram með alúðinni og elskulegheitunum.

Ég þekki margar slíkar. Ég útiloka ekki að ein klæðist mér sjálfum en mun þræta fyrir það því ekki er heldur hægt að útiloka að ég sé þráaskítur.

Annað ágætt hugtak er "ofbeldisgestrisni".

Ofbeldisgestrisni er hluti af gamla góða Íslandi. Ofbeldisgestrisni finnst hjá ömmum sem skella þriðju rasphjúpuðu lærissneiðinni á diskinn hjá manni þrátt fyrir mótmæli og einlæg neyðaróp.

Og gera sig líklega að sækja þá fjórðu þegar bráðaliðarnir eru búnir að koma manni í gang með straujárnunum sínum.

Þriðja hugtakið  á biskupinn sem prédikaði í bókmenntamessu í Akureyrarkirkju í dag.

Það er "fegurð þess brotna".

Fegurð tengist í margra hugum fegurðarsamkeppnum, ávölum línum, samsvörunum, fallegum litum, formum sem gleðja augun og hljóðum sem heilla eyrun.

En fegurðin er líka fólgin í brotnum girðingarstaurum, visnuðum stráum, höltum gamalmennum,  snjáðum bókum og ryðguðum dráttarvélum.

Myndin: Bæjarlækurinn hjá tengdó ristir sinn svip í ævintýralega fjallahöll vetrarríkisins í Svarfaðardal. Honum er ekki alls varnað þótt ekki sé hann stór.

Athugasemdir

[Jón Steinar Ragnarsson, 10.1.2010 kl. 21:03]

Nú fékkstu mig til að hlæja. Maður kannast jú ansi vel við þessi einkenni, en þó auðvitað ekki hjá sjálfum sér. Ég er hryssingurinn uppmálaður og kæfi engan í alúð.  Ég get þó tengt mig við fegurð þess brotna, gamla og lúna. Ég vona að sem flestir sjái hana í mér.

[Hólmfríður Bjarnadóttir, 10.1.2010 kl. 22:58]

Mér finnst orði "ofbeldisgetrisni" vera hrein snilld. Man afar vel eftir því að sem barn kom ég á bæ í námunda við matartíma. Mér var borinn hrókaður diskur af steikti kjöti, sem við smökkun reyndist ver að nýbornum kálfi. Kjötið var eins og slepja upp í mér og ég man hvað ég tók út af klíju við að koma því niður. Með naumindum tókst mér að koma í veg fyrir að önnur slumma væri sett á diskinn minn. Þarna var sko á ferðinni "ofbeldisgestrisni" og þetta var líka meðan bannað var að leifa.

[Islendingur (IP-tala skráð) 11.1.2010 kl. 10:59]

Godann daginn Svavar.

Thakka godann pistil eins og venjulega. Eg man vel eftir thessu med ofbeldisgestrisni hja ommu minni, og ef madur vogadi ser ad segja nei takk, tha sagdi hun alltaf "hvad thykir ther ad thvi"

Thetta er falleg mynd, eins og allar thinar myndir, en manstu hvada dag og klukkan hvad hun var tekin?

Bestu kvedjur

[Svavar Alfreð Jónsson, 11.1.2010 kl. 12:37]

Takk, Íslendingur. 1. 1. 2008 kl. 00:08

[Sigrún Óskars, 11.1.2010 kl. 16:36]

skemmtileg hugtök

[Jón Steinar Ragnarsson, 11.1.2010 kl. 16:37]

Ég rakst annars á skemmtilegt nýyrði hjá heni Ásthildi, sem ég held að eigi sér rót í barnsmunni. "Sérstaklingur" yfir sérstaka einstaklinga. Kannski erum við bara öll sérstaklingar, hvert á sinn máta.

[Svavar Alfreð Jónsson, 11.1.2010 kl. 16:55]

Sammála, Jón Steinar, "það er alla vega merkilegt hve fáir eru eins og fólk er flest", sagði kallinn.

[Kolbrún Stefánsdóttir, 11.1.2010 kl. 22:24]

Þetta er tær snilld. Ég veltist um af hlátri og segi eins og aðrir að þetta er allt mjög kunnuglegt. Eins finnst mér nýyrðið sérstaklingur afar skemmtilegt og andsvar karlsins einnig. Hann hefur eflaust verið sérstaklingur. Einn sjómaður sagði um afar góða kvikmynd. " þetta er besta bíómynd sem enginn hefur nokkurtíma séð "

Takk fyrir þessa frábæru færslu Svavar. Þú ert eins og kletturinn í hafinu. Þú klikkar aldrei. Það vantar bara álfa á þessa mynd hún er svo kynngimögnuð og falleg. Kveðja til ykkar allra Kolla. 

[, 12.1.2010 kl. 15:49]

Ja nú skellihló ég   Þekki bæði alúðarfrekjur og ofbeldisgestrisni - verst þegar þessir eiginleikar sameinast í sömu manneskjunni. En ég hef lengi haft auga fyrir "fegurð þess brotna" og þótt hún fallegri en margt það sem heilt er. Og myndin af bæjarlæknum er frábær. Sem sagt ákaflega gleðivekjandi færsla þarna á ferð hjá þér

[Kolbrún Stefánsdóttir, 12.1.2010 kl. 17:58]

Já meira en fyndið. Alvöru skemmtilegt. Það er kannski ekki úr vegi að upplýsa guðsmanninn að nú er talað um fimm valkosti í sambandi við búsetuhagi fólks. Það er gift, ein ( eða einstök eins og ég segi alltaf ), í sambúð, í fjarbúð og í lúllabúð . Bara svona upp á grínið. Flott færsla enn og aftur. Brotið dót er ekki í uppáhaldi hjá mér en elli, slit og smá beygla er allt í lagi.  Kolla.