Víti

 

Nú hefur stjórnmálastéttin brugðið á sama ráðið og prestastéttin í eina tíð, sem reyndi að hotta fólki inn í guðsríkið með því að hræða það með helvíti.

Óttinn er orðinn meirháttar afl í íslenskri pólitík.

Reynt er að hotta þjóðinni undir ísklafann og til Brussel með ægilegum lýsingum á því sem gerast muni óhlýðnist hún hottinu.

Ef .... þá... 

Þá verða hér okurvextir og ónýtt gengi, landið einangrast, það verður Kúba og Norður-Kórea og enginn vill lána okkur, sjá okkur eða af okkur vita.

Afdankaðir þjóðernissinnar ná hér völdum.

Hin fylkingin er lítið skárri. Ef þjóðin samþykkir ísklafann flyst hún á steinaldarstig. Ef við göngum í Evrópusambandið senda Spánverjar togara sína hingað upp og sjúga allan fiskinn af miðunum. Fullveldið er farið og landráðamenn og kvislingar ríða húsum.

Ef til vill verður þjóðaratkvæðagreiðslan keppni í hvor fylkingin nái betur að hræða líftóruna úr kreppuþjakaðri alþýðunni?

Í gamla daga var talað um víti. Nokkur dæmi úr safni Jóns Árnasonar:

Ef borin er út sæng hjóna á sunnudagsmorgni til að viðra hana þá verður hjónaskilnaður.

Ef maður kveður í rúmi sínu þá tekur hann framhjá.

Ef vanfær kona stígur yfir breima kött verður barnið viðrini.

Ef þunguð kona drekkur vatnsleifar jórturdýra þá jórtrar barnið.

Ef barn kveikir á hríslukvisti eða spýtu og veifar því til og frá eða með eldinum í, þá pissar það undir nóttina eftir.

Ef maður gengur með hendurnar fyrir aftan bakið þá teymir maður djöfulinn - og er það illt verk.

Ef prestur rær á sjó skal hafa kirkjuna opna á meðan og kemst hann þá heill á húfi að landi, en annars ekki; ekki má heldur viðra bækur meðan prestur er á sjó.

Ef maður lætur sokka sína undir höfuð sér getur maður ekki dáið nema sokkar séu látnir undir höfuð manns deyjandi.

Það á eftir koma í ljós hvor vítin séu marktækari, þau sem stjórnmálastétt okkar notar eða hin úr safni Jóns Árnasonar.

Myndin: Kirkjugarðurinn á Höfðanum, Naustahverfið og Súlur.

 

 

Athugasemdir

[Sigríður Laufey Einarsdóttir, 13.1.2010 kl. 20:06]

Skemmtileg og gagnrýnin bloggfærsla ,engu við að bæta. Líka skemmtileg vegna þess hún er skrifuð af presti;- er sér "flísina í eigin auga".

Með kveðju,

Sigríður Laufey Einarsdóttir

[Kolbrún Stefánsdóttir, 15.1.2010 kl. 23:43]

 Ef vanfær kona stígur yfir breima kött verður barnið viðrini.  Þetta er bráðskemmtilegt. Nú get ég skammað mömmu fyrir að fara ógætilega í den.

Var ekki líka sagt að ef maður lokaði kirkjugarðshliðinu á eftir sér þegar maður fór þar inn  væri maður feigur. Þetta er stórskemmtileg færsla eins og fleiri, sérstaklega upp á síðakastið.

Alveg sammála færslunni og hef ógeð á því ofbeldi sem felst í að nota óttann. Ég er líka á móti því að misnota fyrirgefninguna. Íslendingar hafa lært að sigra óttan og eru nú að ná fram rödd skynseminnar í alþjóðasamfélaginu. Auðvitað förum við ekki til helvítis. Auðvitað fáum við einhverja styrki þegar fiskveiðar duga ekki lengur ef við förum í ESB. En það er eins með ESB og guðsríkið, erfitt að vita fyrr en eftir á . Bestu kveðjur Kolla.