Að standa upp úr sófanum

Í Grímu hinni nýju er sagt frá tveimur kerlingum þingeyskum. Þetta var þegar vesturferðir voru í tísku. Kerlingunum leist best á að komast alla leið til Brasilíu. Þeim hafði verið sagt að þar sprytti bæði kaffi og sykur. Ekkert fengu þær betra en það og töldu þær landið því algjöra paradís.

Voru þær staðráðnar í að flytja til Brasilíu og fóru að grennslast fyrir um hvernig ætti að komast þangað.

Var þeim sagt að siglt væri af stað frá Akureyri. Þær þyrftu því að fara þangað fyrst.

Þótti kerlingunum þá "óvænkast ráð sitt" því ekki gátu þær komist til Akureyrar nema fara yfir Fnjóská.

Fnjóská var að þeirra mati svo ægilegur farartálmi á leiðinni til Brasilíu að þær lögðu öll áform um flutninga þangað suður á hilluna.

Þessi saga minnir okkur á að oft eru mestu torfærurnar þær að standa upp úr sófanum.

Myndin: Hláka í Innbænum á Akureyri.

Athugasemdir

[Kolbrún Stefánsdóttir, 20.1.2010 kl. 22:32]

hahaha snilldar vel skrifaður pistill og ótrúlega fyndinn. Hvað er að gerast með þig Svavar ertu búinn að fá þér aðstoðarritstjóra sem sér um fyndnina. Ég verð að segja að alltaf var nú mikil viska í pistlunum þínum en núna er hún sett fram af slíkri kímni að maður getur hlegið endalaust. Ég þingeysk kerlingin sé þetta ljóslifandi fyrir mér. Þúfurnar í hausnum á manni, þær fella mann , það er málið.  hahaha bráðnauðsynlegt að komast til Brasilíu. Bestu kveðjur Kolla.

[Jónína Dúadóttir, 21.1.2010 kl. 06:45]

Svo satt

[, 21.1.2010 kl. 14:38]

Kannast við það    Skemmtisaga á heimsmælikvarða