Pínulítil ferðasaga

Ég er nýkominn úr tæplega tveggja vikna ferð um Þýskaland.

Erindi mitt þangað var tvíþætt.

Annars vegar hjólaði ég með félögum mínum frá borginni Cottbus til Berlínar. Við fylgdum ánni Spree og lentum í alls konar hremmingum.

Þær hófust með því að fluginu út seinkaði um marga klukkutíma. Eyjafjallajökull sá til þess að við misstum fyrstu hótelnóttina úti. Við komum á hótelið um hádegisbil, ósofnir og órakaðir, og fengum að bregða okkur inn á klósett til að afklæðast ferðafötum en skrýðast hjólaklæðnaði.

Hann var ekki skorinn við nögl því það var skítakuldi.

Næstu daga skulfum við á hjólunum. Við fórum ekki inn á knæpur til að fá okkur einn kaldan heldur til að ná okkur í hita. Tennurnar glömruðu á bjórkrúsunum. Heilar sjö gráður voru þegar hitinn náði lágmarki. Þá rigndi á okkur í ofanálag.

Kuldinn virtist örva mývarg svæðisins til dáða. Sennilega hefur verið notalegt fyrir hann að komast í blóðheita Íslendinga. Einn daginn vorum við hreinlega étnir og nánast ekkert eftir nema íþróttaskórnir og farsímarnir.

Áfangastað náðum við þó og þrátt fyrir ýmsar hættur og harðræði höfðum við lúmskt gaman af öllu saman.

Því miður á ég engar myndir af þessum hluta ferðarinnar því vélin mín var étin af fluguflykki.

Enda verða myndavélarnar alltaf minni og minni en mýflugurnar stærri og stærri.

Hins vegar var ég í Þýskalandi hjá vinafólki í borginni Lueneburg.

Hún er rétt sunnan við Hamborg.

Ég hafði aldrei komið til Lueneborgar áður en varð ekki fyrir vonbrigðum. Hún er með fallegri borgum í Þýskalandi. Nánast óspjölluð af stríðinu og með einstaklega fallegan miðbæ.

Áin Ilmenau rennur í gegnum hana. Lueneborg er svo sannarlega heimsóknarinnar virði.

Myndin er þaðan. Ég útvegaði mér nýja og mýhelda myndavél í Hamborg.

Athugasemdir

[Páll Eyþór Jóhannsson, 25.5.2010 kl. 08:07]

Greinilega skemmtileg ferð og frásögnin næstum því jafn trúleg og hjá Skriðulang úr Svarfaðardal. Án gríns hefur þetta eflaust verið skemmtilegasta ferð.

[Jóna Lovísa Jónsdóttir (IP-tala skráð) 25.5.2010 kl. 21:23]

Ótrúlega spennandi ferð ;-)  Verð eiginlega að fá að fara með næst...eða....eh...nei, ætli ég fari ekki aðeins sunnar ;-)  Góð ferðasaga Svavar!