Hin altæka verðskynjun

 

Þróun mannsins virðist ekki alltaf hafa verið til bóta og flokkast jafnvel stundum frekar til afturfarar en framþróunar.

Sú var alla vega niðurstaða samtals við góðan vin nú á dögunum.

Hann benti mér t. d. á að dýr væru mjög næm á veður. Vissu hvernig veðrið yrði. Þau væru svo vel læs á náttúruna.

Vinur minn kvaðst sannfærður um að eitt sinn hefði mannskepnan haft þessa sömu hæfileika en þeir hefðu glatast í þróuninni svonefndu.

Skynjun okkar á umhverfinu verður sífellt lélegri.

Þess í stað er maðurinn að rækta með sér svokallað verðskyn.

Stundum er eins og það eigi að vera eina skynið.

Heimspekingurinn Atli Harðarson ritar ágæta grein um ESB- umræðuna í Mogga dagsins. Þar segir hann:

Það hefur um árabil þótt nánast hallærislegt að tala um pólitískar hugsjónir sem ekki er hægt að rökstyðja með því að þær auki hagvöxt eða stuðli að bættum efnahag.

Menn nota peninga til stuðnings máli sínu, hvort sem um er að ræða heilsu, fjölskyldu, náttúru eða trúarbrögð.

Oft virðast peningar einu rökin sem bíta.

Það þarf ekki að koma á óvart.

Karl sálugi Marx benti á að til að þrífast þyrfti kapítalisminn að umbylta þjóðfélaginu á gagngeran hátt.

Kapítalisminn ræðst gegn öllu sem talið hefur verið sjálfsagt, endurmetur öll gildi, afhelgar allt sem heilagt er og eyðir því táknræna.

Á endanum á tilveran ekki að hafa neitt gildi nema verðgildið og mannskepnan enga dómgreind nema til að geta séð hvar hagnaðarvonin sé mest.

Áhugasömum bendi ég á tvær ágætar bækur um þetta. Annars vegar bók nóbelshagfræðingsins ameríska Gary S. Becker The Economic Approach to Human Behavior, Chicago 1976, og hins vegar bók franska heimspekingsins Dany-Robert Dufour L´art de réduire les têtes - sur la nouvelle servitude de l´homme libéré à l´ère du capitalisme total, Paris 2003.

Myndin er af kjafti Eyjafjarðar.

Athugasemdir

[doctore (IP-tala skráð) 11.9.2010 kl. 13:56]

Það er fullkomlega eðlilegt að mannkynið missi þessa hæfni sem mörg önnur dýr eru með... einnig er fullkomlega eðlilegt að eitthvað annað taki við, í takt við þarfir hvers tíma ...

Hversu dýrum dómum kaupum við hið falska öryggi trúarbragða á... það er löngu tímabært að mannkynið noti verðskynið á þann kafla í lífi sínu... fólk borgar og borgar verndartolla... sem aldrei virka... og þú ert að selja þetta Svavar minn :)

[Villi (IP-tala skráð) 11.9.2010 kl. 18:49]

 Fyrir hinn fátæka eru slík prinsipp lúxus sem hann kannski verður að fórna. Víst hefði verið ágætt fyrir atvinnulífið að hafa Gefjun og Iðunn og Álafoss. Þessar fabrikkur framleiddu ágætis föt, en ég ríkisstarfsmaðurinn með 176 þús upp úr buddunni get ómögulega borgað á annan tug þúsunda fyrir skó eða 20 þúsund fyrir gallabuxur. Ég vil fá lækkun líka í matvörunni. Búandi í Breiðholtinu með þessi laun hefi ég ekki efni á að njóta landsins.

 Ætli hálf milljón sé ekki lágmark til að geta leyft mér þann lúxus að borga 30% átthagatoll og að mæta vaxtasveiflum ef Framsóknarþingmaður dettur í ærlega kjördæmauppbyggingu. 

Þið prestarnir til hægri eruð farnir að minna á kaþólsku prestana í S-Ameríku sem hafa í gegnum aldirnar haldið niðri lýðnum. Passað upp á að fátæklingarnir fari nú ekki að bylta skipulaginu. Sitjandi sjálfir í gulli skreyttum kirkjunum við allsnægtir ykkur til handa.

[Kolbrún Stefánsdóttir, 11.9.2010 kl. 23:06]

Sæll Svavar. Það er eðlilegt að nokkur munur sé á okkur og hinum skepnunum hvað varðar veðurskyn beint við náttúruna. Við erum búin að þróa mælitæki til að sjá um þetta og spá fyrir um veðrið. Vilt dýr þurfa að vera "á tánum " með veður þar sem það getur skipt þau miklu máli hvernig veður verður og hvort þau komist í skjól.

þetta með verðskynið er ég ekki sammála um. Okkur vantar að endurheimta verðskynið ef við höfum einhvertíma haft það. Þau mælitæki og spálíkön sem við höfum þróað og notað, hafa reynst kolvitlaus og því eru nú margir að svamla í skuldasúpunni.  Mér hefur nefnilega lengi fundist Íslendingar ekki hirða neitt um það hvað hlutir kosta, þeir bara kaupa og kaupa , taka lán og tapa geðheilsunni og öllum pakkanum, flestir.

Kveðja Kolla

Ég var í Danmörk fyrir stuttu og tók eftir því að allt var hugsað í verði og viðskiptum. Talað um hvað allt kostaði alveg niður í oststykki.