Landinu stolið, þjóðin svívirt

 

Í rannsóknarskýrslu Alþingis kemur fram að bankarnir hafi verið tæmdir.

Fyrirtækin voru líka ryksuguð, bútuð í sundur, eyðilögð og seld.

Meira að segja bótasjóðum tryggingafélaganna var ekki hlíft.

Og greipar voru látnar sópa um lífeyrissjóðina okkar.

Nú eru okkur fluttar fréttir um að á næstunni megi búast við að yfir 70.000 íslenskar fjölskyldur verði eignalausar.

Þar er um að ræða fólk sem notaði peningana sína til að kaupa sér bíla og fasteignir. 

Fjármálastofnanir buðu fólki lán til kaupanna.

Nú hafa lánin bólgnað út en eignirnar fallið í verði. Eignastaðan er núll eða jafnvel neikvæð. Eign fólksins er farin.

Þá byrjar spuninn.

Alþýðunni, sem tapaði öllu, eignum sínum, atvinnu og velferðarkerfinu (Húsavík er nýjasta dæmið um það), þessari alþýðu er sagt að hún hafi stolið þessu öllu af sér sjálfri með því að kaupa sér of stór hús, of dýra jeppa og of marga flatskerma.

Og enda þótt ekki nema hluti þjóðarinnar hafi látið glepjast af gylliboðum kemur þessi áróður þráðbeint frá þeim sem seldu fólkinu húsin stóru, jeppana dýru og skermana mörgu.

Þegar líkur eru á að meirihluti þjóðarinnar sé að tapa öllum eignum sínum ritar Gunnar Smári Egilsson grein í Morgunblaðið, þar sem hann varar við svonefndri séreignastefnu. (Í Guðs bænum, ekki endurreisa séreignastefnuna! Viðskiptablað Moggans 7. 10.)

Á sínum tíma stjórnaði Gunnar þessi Smári fjölmiðlaútrás Baugsveldisins sem endaði með stjarnfræðilegu gjaldþroti eins og frægt er orðið.

Gunnar Smári má ekki til þess hugsa að fólk eignist þak yfir höfuðið.

Þess í stað á það að leigja sér húsaskjól.

Og hverjir eiga að vera leigusalar?

Jú, Gunnar Smári vill að bankarnir eigi húsnæðið og sjái um að leigja fólkinu það.

Að mati Gunnars Smára er bönkunum miklu betur treystandi til að eiga íbúðarhúsnæði en fólkinu.

Ekki er  nóg með að þessi allslausa og svívirta þjóð eigi að vera skuldaþræll bankanna ævilangt.

Fólkið skal vera leiguliðar þeirra líka.

Myndin er af haustlaufi í Lystigarðinum.

Athugasemdir

[Islendingur (IP-tala skráð) 8.10.2010 kl. 09:03]

Vel sagt og godur pistill hja ther eins og alltaf.

Ef ad folkid stœdi saman og gerdi eitthvad, eins og i Frakklandi til dœmis,

tha vœru hlutirnir kannski odruvisi i dag.

[Sigurgeir Árnason. (IP-tala skráð) 8.10.2010 kl. 13:08]

Það má segja að bankarnir séu krabbamein í þjóðfélaginu ,það svífst einskis í samskiptum sínum við almúgann og það sem verra er að stjórnvöld leggja blessun sína yfir herlegheitin.Ekkert eftirlit virðist vera frá opinberum aðilum með bankaeinræðinu,fróðlegt væri að gerður væri samanburður á bankastarfsemi hérlendis og í nágrannalöndunum.Öllum er ofboðið frekjan og yfirgangurinn í þessum stofnunum sem eiga að þjóna fólkinu en ekki öfugt.Meðan verðtryggingin er við lýði reyna bankarnir að ýta undir verðbólgu til þess að ná betri tökum á lýðnum.

[Sif Jónsdóttir (IP-tala skráð) 8.10.2010 kl. 20:13]

Myndin er falleg. 

 Sannleikurinn í tekstanum er ófagur, má segja að myndin toppi textann

Meðan verðtryggingin er við lýði reyna bankarnir að ýta undir verðbólgu til þess að ná betri tökum á lýðnum.

Það kallast markaðsmisnotkun. Markaðsmisnotkun er ólögleg en það er ekkert gert í því.

[Haraldur Hansson, 12.10.2010 kl. 14:13]

Svavar, ef þú sérð ekki Moggann vil ég benda þér á að þessi færsla rataði inn í leiðara dagsins - óstytt. Gott mál, enda fín færsla sem setur sannleikann fram á skýran hátt. 

[Svavar Alfreð Jónsson, 12.10.2010 kl. 20:58]

Takk fyrir ábendinguna og hrósið, Haraldur!

[Egill Helgason (IP-tala skráð) 15.10.2010 kl. 12:42]

Þetta er lélegt svar við grein sem er mjög málefnaleg. Væri alþýða þessa lands verr sett ef hún gæti treyst á alvöru leigumarkað eins og er í Skandinavíu í stað þess að þurfa að hætta fjárhagslegu öryggi sínu á húsnæðismarkaði sem er sífellt á fleygiferð – og hefur tvívegis á þremur áratugum lent í slíkri krísu að heilu kynslóðirnar stórskaðast.

[Svavar Alfreð Jónsson, 16.10.2010 kl. 10:55]

Nei, Egill, fólk væri svo sannarlega ekki verr sett ef það gæti treyst á alvöru leigumarkað hér á landi og því er hvergi haldið fram í þessum pistli. Og hvernig er það í Skandínavíu, eru það bankarnir sem eiga íbúðarhúsnæðið og sjá um að leigja fólkinu það eins og Gunnar Smári stingur upp á að verði hér á landi?