Eymd íslenskra fjölmiðla

 

Ég hef miklar mætur á blaðamanninum Sölva Tryggvasyni og les gjarnan pistlana hans á Pressunni. Oft finnst mér hann hitta naglann á höfuðið.

Eldsnemma í dag birti hann þennan pistil um íslenska fjölmiðla.

Þar segir Sölvi að valdið yfir fjölmiðlunum sé í höndum neytenda. Fjölmiðlar segi þær fréttir sem fái mestan lestur, hlustun eða áhorf.

Ég er sammála Sölva um að ekki sé nóg að beina athyglinni að fjölmiðlunum. Líka þurfi að huga að hlustendum, áhorfendum og lesendum. Löngu er orðið tímabært að taka upp kennslu í fjölmiðlanotkun í skólum landsins.

Í dag átti ég þess kost að heyra forsvarsmenn Siðmenntar segja frá fermingarfræðslu á vegum samtakanna. Þar á bæ er lögð mikil áhersla á að kenna gagnrýna hugsun.

Gagnrýnin hugsun er eitt af því sem þarf til að búa hér til mynduga fjölmiðlanotendur.

Sambandið milli fjölmiðla og neytenda er samt ekki lengur svona þráðbeint eins og margir telja að það sé.

Ef mér mislíkar Fréttablaðið get ég t. d. ekki sagt því upp. Það kemur til mín hvort sem mér líka betur eða verr.

Það er miklu hættulegra fyrir Fréttablaðið að styggja auglýsendur en neytendur því blaðið lifir á auglýsingunum.

Og síðast en ekki síst á á blaðið líf sitt undir velvilja eigenda sinna sem „ráða þessu á endanum", eins og framámaður í stétt blaðamanna orðaði það á sínum tíma.

Fréttablaðið þarf ekki að lúta neinu áskrifendavaldi. Lesendavaldið hefur verið veikt, en eigendavaldið og auglýsendavaldið hefur á hinn bóginn eflst.

Reyndar eru fæstir fjölmiðlar hér á landi reknir með hagnaði. Ég held að bullandi tap sé á þeim flestum. Þeir fá ekki peninga til að reka sig frá neytendum.

Peningarnir koma annars staðar frá og þar er ef til vill einn helsti veikleiki íslenskra fjölmiðla:

Þeir slá ekki á höndina sem mokar í þá peningunum.

Eins og dæmin sanna.

Myndin: Norðlenskt hestalíf

Athugasemdir

[Gylfi Gylfason (IP-tala skráð) 23.10.2010 kl. 13:37]

Ég bauð fjölmiðlamanni að ræða smásöluálagningu í viðtali við mig fyrir skemmstu en ísland er dýrasta smásöluland heims og vandinn liggur í yfirkeyrðri álagningu vegna blokkamyndunar.

Eru vitlaus maður sagði fjölmiðilinn, veistu ekki hverjir borga launin okkar.

Segir ýmislegt....

[Gísli Ingvarsson, 23.10.2010 kl. 16:34]

"Það er auðvelt að henda steinum úr glerhúsi, en gleymið því ekki að við fjölmiðlamenn missum vinnuna ef enginn hefur áhuga á því sem við gerum. Sama hvað það er gáfað, djúpt og flott!"- mér dettur í hug að þetta eigi við um kirkjuna líka, sem hefur vandað sig mjög í málflutningi og prédíkunum síðan ég óx úr grasi. Er það nú að verða ógnun við tilvist hennar? Prestar í dag eru yfirleitt fremri forverum sínum, þó það sé hvorki satt né sanngjarnt í einstaka tilfellum. Það jákvæða sem kirkjan gerir er fljótt að missa glansinn þegar eitthvað neikvætt kemur upp. Trúleysingjarnir sem nú hamra mjög á lykaborðin á netinu eru ekki sérlega djúpir en þeim mun óskammfeilnari og "sannfærðari". Það hrífur marga með sér.

Á móti kemur að með hverri þjóð sem hefur langa sögu vinsast út það versta með tímanum og því hef ég góða von um að tjón neikvæðrar umræðu verði ekki eins mikið og efni standa til.