Þannig á að leysa skuldavanda heimilanna

 

Í vikunni fékk þjóðin ennþá einu sinni fréttir af stórfelldum skuldaniðurfellingum einstaklinga.

Leiðrétting skulda venjulegs alþýðufólks er snúnara mál.

Í gær mættu í Kastljósið til að ræða þau mál þeir Árni Páll Árnason, efnahags- og viðskiptaráðherra, og Sigmundur Davíð Gunnlaugsson, formaður Framsóknarflokksins.

Athyglisverð þóttu mér eftirfarandi orðaskipti efnahags- og viðskiptaráðherra og Brynju Þorgeirsdóttur, fréttamanns:

Brynja: Hvaða leið hugnast þér? Þú varst á þessum fundi í dag, m . a. með bönkunum. Eru bankarnir opnir fyrir því að gefa einhvern afslátt, að fara einhverja leið sem kostar þá einhverjar fjárhæðir?

Árni Páll: Ja, ég hef ítrekað talað fyrir því að bankarnir þurfi auðvitað að koma til leiks og að þeir þurfi að skila til þjóðarinnar því svigrúmi sem þeir hafa til að mæta fólki í greiðsluerfiðleikum og skuldaerfiðleikum.

Brynja: En er það raunsætt að þeir muni taka á sig einhverjar gríðarlegar fjárhæðir í þessu?

Árni Páll: Þeir fengu svigrúm og ég vil að þeir nýti það svigrúm og mér finnst eðlilegt að ætlast til þess af þeim og það auðvitað er uppleggið frá okkar hendi. Við þurfum að reyna að finna lausn sem gerir okkur kleift að loka þessu máli en við verðum að muna það að við verðum að leysa þetta mál, það er engum öðrum til að dreifa til að leysa þetta mál. Við þurfum að ná sátt um niðurstöðu. Við þurfum að tryggja að hún sé þannig að banka leggi allt það af mörkum sem þeir geta...

Brynja: En nú ber þeim engin lagaleg skylda til að veita neinn afslátt, þú ert að treysta svolítið á svona þeirra góða vilja. Er það ekki svolítið haldlítið?

Árni Páll: Það liggur auðvitað ljóst fyrir að þeir þurfa að mæta afskriftum, þeir þurfa að umbreyta lánum til þess að laga eignasafn sitt og til þess hafa þeir fengið svigrúm. Það svigrúm eiga þeir að nýta og þurfa að nýta og mér fannst gott að heyra í dag að þeir voru tilbúnir til viðræðna.

Í morgun las ég svo frétt á Eyjunni, undir fyrirsögninni Skuldir heimilanna: Bankarnir segja svigrúm til afskrifta fullnýtt. Þar segir:

Ekki er frekara svigrúm til afskrifta húsnæðisskulda að mati forsvarsmanna bankanna. Þeir segja það svigrúm sem skapaðist þegar lánin voru færð úr gömlu bönkunum yfir í þá nýju með afföllum sé nánast fullnýtt með þeim úrræðum sem þegar hefur verið gripið til, og verði það örugglega þegar gengistryggðu lánin verða leiðrétt.

 Svo mörg voru þau orð.

Myndin: Vetrarleg Akureyri.

Athugasemdir

[Tryggvi Helgason, 12.11.2010 kl. 23:27]

Það verður að afnema verðtryggingarnar á lánum. Bankar, lánastofnanir og lífeyrissjóðir sem hafa hagnast á vísitöluhækkununum, - þeim ber að skila öllum þeim peningum, þar sem þeir peningar eru illa fengið fé. Það ber engum skilda til þess að "endurgreiða" peninga til lánastofnana, sem viðkomandi lántakandi hefur aldrei fengið lánaða.

Alþingi verður að afnema vísitölutryggingarnar og setja jafnframt lög um að öll lán verði endurreiknuð frá 1, janúar 2008, og að allur mismunur verði endurgreiddur til lánþega.

Allt fé sem kom til með þessum vísitöluhækkunum, og sem verður þá að endurgreiða núna, - frá lánastofnunum "TIL" lántakenda, - er frá upphafi "hrein eign" lántakenda. Þetta eru peningar sem lántakandinn átti og á, og bar aldrei nein skylda til þess að afsala sér eða láta frá sér.

Lánastofnanirnar "tapa engu" með því að greiða vísitöluhækkanirnar til baka, því þetta eru peningar sem þeir áttu aldrei og eiga ekki. Lánveitendur eru einfaldlega með þessu að skila peningum til réttra eigenda.