Svavar Alfreð Jónsson

8.4.2011 | 16:42

Okkar jákvæða nei

Því er haldið fram að Icesave hverfi ef við segjum já á morgun. Jáið sé til þess að fá málið út úr heiminum.

Sannleikurinn er sá að hvorki já né nei á morgun láta Icesave hverfa. Með því að segja já hverfur skuldin ekki. Já þýðir þvert á móti viðurkenning á skuldinni.

Skuldin verður þjóðarinnar ef hún ákveður það í þjóðaratkvæðagreiðslunni á morgun. Þá eigum við eftir að greiða hana, skuld sem við vitum hvorki upphæðina á né greiðslutíma.

Undanfarin ár hefur verið unnið að því með alls konar hótunum, þvingunum og kúgun að fá þjóðina til að taka á sig þessa skuld, bæði af innlendum og erlendum stjórnvöldum.

Nýleg birtingarmynd kúgunarinnar er sú hótun verkalýðsforingja og talsmanna atvinnurekenda að almenningur þessa lands fái engar launahækkanir nema hann játist þessum skuldum.

Fólkið liggur vel við höggum kúgaranna. Fáir áttu peninga aflögu til að leggja inn á hávaxtareikninga. Flestir áttu lítið nema kannski hlut í húskofa. Það var lífeyrir margra. Nú hefur sú eign fuðrað upp. Fólkið hefur þurft að taka á sig bæði skattahækkanir og launalækkanir. Verð á nauðsynjum hefur rokið upp. Margir hafa ekki vinnu og lifa á smánarbótum.

Þetta fólk á að þvinga til að borga bankaskuldir á meðan það hlustar á fréttir af nýjustu ofurlaununum í nýju bönkunum.

Óréttmæt skuldsetning þjóðríkja er ekki ný af nálinni í veröldinni. Í fyrra var eitt tölublað Víðförla, fréttablaðs Þjóðkirkjunnar, helgað baráttunni gegn henni, í tilefni af heimsókn tveggja fulltrúa Lúterska heimssambandsins hingað til lands, aðalritarans Martin Junge og Peter Prove, yfirmanns alþjóðasviðs og mannréttinda hjá sambandinu. Þar er þetta eftir þeim haft:

Frá kirkjulegu sjónarhorni lítum við á heimsbyggðina sem hús eða heimili sjálfs Guðs -oikos. Efnahagslífið - oikonomia - á að að þjóna velferð hennar allrar. Í dag hefur hins vegar almennri velferð verið vikið til hliðar fyrir önnur markmið alþjóðlegs fjármálamarkaðar, sem eru vöxtur og gróði. Af biturri reynslu hefur fólk á Íslandi og annars staðar í heiminum lært að þessi gróði safnast á hendur fámennrar fjármálayfirstéttar á meðan fjárhagsleg áföll og félagslegt tap falla á arðrændan meirihlutann.

Í Víðförla segir ennfremur:

Lúterska heimssambandið hefur haft samband við þjóðkirkjuna og velt upp spurningum er varða stöðu þjóðarinnar og ólögmætar skuldir. Bent er á að margt sé líkt með Icesave og óréttmætri skuldsetningu annars staðar í heiminum.

Nei á morgun mun ekki láta Icesave hverfa og heldur ekki útrýma óréttmætri skuldsetningu þjóðríkja.

Nei á morgun er eitt skref á langri leið. Nei á morgun er jákvætt framlag til betri og réttlátari heims.

Í dag skrifar Eva Joly greinar í blöð. Niðurlagsorð hennar þar eru:

Efnahagskreppan hefur leitt af sér ólýsanlegar hörmungar fyrir milljónir einstaklinga sem hafa misst heimili sín, vinnu og eftirlaun. Þetta fólk hefur þurft að reyna á eigin skinni afleiðingar kreppunnar, á meðan alþjóðlegir fjármálamenn, bankamenn og skuldabréfaeigendur halda skaðlausir öllum sínum bónusgreiðslum, ævintýralegum launum og ágóða, eins og ekkert hafi ískorist. En afleiðingar kaldrifjaðrar og áhættusækinnar hegðunar þeirra eru öllum sýnilegar, eins og sprengjugígar í efnahagslandslaginu. Augu heimsins hvíla nú á íslensku þjóðinni, sem hefur hingað til hafnað öllum Icesavekröfum; kröfum um að ganga í skilyrðislausar ábyrgðir fyrir fjármálageirann. Það er mín von að þessi jákvæði baráttuandi muni hafa yfirhöndina í þjóðaratkvæðagreiðslunni.

Myndin er af brúm.

Flokkur: Bloggar | Facebook

Athugasemdir

- ef við kaupum það fyrirkomulag sem hefur ríkt í samfélag okkar sem hinn eina og mesta sannleika lífsins þá eru við í raun að samþykkja það og þar með fæða það áfram.

En svo hefur það gegnið fram af mörgu okkar og við fundum innra með okkar að svona gæti það ekki verið. Þegar hér var komið sögu var okkar öruggasta leið til að breyta því - að sjá í gegnum blekkingarnar og einnig að átta okkur á að við gætum aðeins verið sú breyting sem við vildum sjá. Það hefur verið ærin vinna að horfast í augu við sínar eigins hugmyndir eða forritun hugans frá barnsaldri og átta sig á að þetta var eiginlega allt okkar uppfinning og í raun risastór blekking.

- nú erum við að vakna upp af þessum draum um hinn svokallaða veruleika -

Eigðu góðar stundir!