Fermingardagurinn

Nú standa yfir fermingar og þessa helgi fermdust 22 börn í Akureyrarkirkju, þau fyrstu af um það bil 130 fermingarbörnum ársins 2013. Hér eru nokkrar myndir frá síðustu spennuþrungnu mínútunum fyrir fermingarathöfnina.

 

Börnin voru mætt laust fyrir klukkan 10 í morgun en messan hófst kl. 10:30. Konur úr Kvenfélagi Akureyrarkirkju tóku á móti börnunum og hjálpuðu þeim í kyrtlana.

Margar telpnanna fóru eldsnemma á fætur til að komast í hárgreiðslu. Drengirnir gátu flestir sofið lengur þó að nú séu jafnréttistímar.

Fermingardagurinn er hamingjudagur. Þá eiga börnin að finna hvað þau eru okkur dýrmæt og hvað við erum þakklát fyrir þau.

Margir eru búnir að leggja mikið á sig til að fermingardagurinn verði sem ánægjulegastur. Veislur hafa verið útbúnar, föt keypt, gjafir valdar og ástvinir ferðast landshluta á milli og koma jafnvel frá útlöndum til að samfagna fermingarbarninu. Krakkarnir eru líka búnir að hafa mikið fyrir deginum og hafa til dæmis sótt fermingarfræðslu allan veturinn og lært sálma, vers, boðorðin tíu og ýmislegt fleira. Nú er komið að lokaáfanganum. Dagskrá fermingarmessunnar er brotin saman og henni stungið inn í splunkunýja sálmabókina.

Síðustu andartökin í hinni ófermdu tilveru þessara herramanna.

Organistinn Sigrún Magna Þórsteinsdóttir æfir Stúlknakór Akureyrarkirkju sem sá um sönginn í fermingarmessunni.

Fermingarbörnin búin að stilla sér upp í röðina nokkrum sekúndum áður en kirkjuklukkurnar hringdu og messan byrjaði. Þetta var yndislegur hópur.

Guð blessi þau!

Athugasemdir

[Jósef Smári Ásmundsson, 7.4.2013 kl. 20:11]

þér er vonandi ekkert illa við að ég guðleysinginn stelist hérna inn á síðuna en hef alltaf langað til að spyrja þig um frændgarðinn síðan ég sá nafnið.Þannig er að frændfólkið mitt frá Molastöðum í Fljótum (BYKO ættin) hefur sömu nafngiftir.Jón Helgi,Alfreð Jónsson,Svavar Jónsson svo ég nefni nokkra.Amma mín var Jósefína Jósefsdóttir systir Helgu frá Molastöðum.ER einhver tenging þarna?

[Svavar Alfreð Jónsson, 7.4.2013 kl. 20:25]

Komdu fagnandi, Jósef Smári! Nei, ég held að þetta séu skemmtilegar tilviljanir. Ég heiti í höfuðið á móðurafa mínum, Svavari Björnssyni frá Grenivík. Alfreðsnafnið er frá fóstra hans pabba, sem ég kallaði alltaf afa. Sá var Jónsson og úr Innbænum á Akureyri. Systir hans, Helga, giftist að mig minnir til Siglufjarðar. Kristján langafi minn var uppalinn í Flókadalnum og Emelía amma mín kom úr Ólafsfirði. Þar á ég skyldfólk. Hin amma mín, Pálína, var frá Hesteyri í Jökulfjörðum. Hennar maður, Guðlaugur afi, var úr Kinninni. En Fljótin eru ein fallegasta sveit landsins og ég fæ mér oft málningu og nagla í BYKO.

[Jósef Smári Ásmundsson, 8.4.2013 kl. 05:50]

Nú jæja.Þú ert svo sen ekkert verri fyrir það.En þakka þér fyrir að svala forvitni minni.Þá ætti maður að geta sofið á nóttinni.