Hotel Sole

Við Akureyringarnir sem sækjum Mörk heim í sumar munum dvelja á Hotel Sole í strandbænum Marotta, rétt hjá borginni Fano. Sumarið 2005 átti ég 9 daga dvöl á þessum ágæta gististað ásamt konu og dætrum. Er skemmst frá því að segja að við snarféllum fyrir sólarhótelinu. Það er lítið, ekki laust við að vera lúið eftir margra ára dygga þjónustu við ferðafólk og sóldýrkendur, en snyrtilegt og með mikinn sjarma. Gamalt hótel með sál. Síðustu 37 árin hefur signor Bruno Rapa staðið þar við stjórnvölinn. Nýlega tóku þeir feðgar Bruno og Boris yfir hótel skammt frá, Casadei. Gerðu þeir húsnæðið upp og reka nú af sama myndarskap og Sole. Hefði svosem verið við hæfi að dvelja þar í safnaðarferð, því Hotel Casadei þýðir Hótel Guðshús. En við veðjuðum á Sole. Það stendur við yndislega einkaströnd. Ég öslaði út á fagurblátt Adríahafið með morgunverðinn á tungunni.

Að sjálfsögðu keyptum við dvölina með öllum máltíðum. Stemmningin í matsalnum er svipuð og í sömu vistarverum í bíómyndum frá því eftir stríð. Stinamjúkir þjónar með hvítar þurrkur á framhandleggjum ganga gæsagang milli borða. Fæstir þeirra tala annað en móðurmálið og sama máli gegnir um matseðilinn, enda eru meira en 80% ferðamanna á Mörkum ítalskir. Þú bara pantar og vonar það besta. Eftir nokkra daga veist þú að þú ert öruggur með að geta borðað alla vega einhvern af þeim fjóru réttum, sem eru þér bornir við hverja máltíð. Svo er ekki nema spottakorn í næstu ísbúð, en þó að ítölsk menning hefði ekki getið annað af sér en ísinn, gelato, ætti hún skilið eilífa vegsemd og lof.