Urbino

Margar gamlar og merkilegar byggingar er að finna í hinni þokkafullu borg Urbino á Mörkum, enda er hún á heimsminjaskrá UNESCO. Hluti þeirra er frá stjórnartíð Federico da Montefeltro (1422 - 1482), en hann var hertogi í Urbino frá 22ja ára aldri til æviloka. Þeirra á meðal er höll hertogans, Palazzo Ducale. Hún hýsir þjóðarlistasafn Marka, Galleria Nazionale delle Marche. Þar gefur að líta stórkostlegt úrval listar frá tíma endurreisnarinnar, t. d. með verkum eftir snillingana Raffaello og Titian. Sá fyrrnefndi var fæddur í Urbino.

Endurreisnin (renaissance) nefnist tímabilið milli miðalda og siðbótar, frá 14. fram á 16. öld. Helstu einkenni hennar voru aukin áhersla á klassísk fræði, meiri umsvif páfavalds, framfarir í vísindum og þróun fjarvíddar í sjónlistum. Federico hertogi var einn af leiðtogum ítölsku endurreisnarinnar og beitti sér meðal annars fyrir því að stofnað var bókasafn í Urbino. Það var á sínum tíma annað mesta bókasafn á Ítalíu, næst á eftir safni sjálfs Vatíkansins.

Háskólinn í Urbino er á gömlum grunni, stofnsettur árið 1506. Í honum eru 22.000 stúdentar, flestir af erlendu bergi brotnir. Skólinn er þekktur fyrir nám í hugvísindum og þykir bjóða upp á frábært nám í ítölsku.

Dómkirkja hefur verið í Urbino frá árinu 1021.