Dulhyggjudoktorar

Heilög Teresa og heilagur Jón af krossinum verða viðfangsefni okkar félaganna úti í Salisbury núna síðar í mánuðinum.

Heilög Teresa (1515 - 1582) fæddist í borginni Avila á Spáni og er við hana kennd. Hún var af aðalsættum og fékk uppeldi sem slík. Ung hafði hún áhuga á rómantík, tísku og ilmvötnum segir  The Oxford Dictionary of Saints. Slík hugðarefni æskufólks eru því ekki beinlínis nýtilkomin. Tvítug gerðist Teresa nunna en eftir aldarfjórðungs dvöl í klaustri stofnaði hún sitt eigið. Þar ríktu strangar reglur um fátækt, einangrun og einfalda lífshætti. Teresa tók þátt í siðbót kaþólsku kirkjunnar í heimalandi sínu, hreyfingu fólks sem ekki aðeins vildi ytri breytingar á kirkjunni heldur innri endurnýjun. Er henni skipað á bekk með dulhyggjumönnum, sem lögðu áherslu á hinn dulræna samruna við Krist. Árið 1622 var Teresa tekin í dýrlingatölu og 1970 var hún útnefnd einn af doktorum rómversku kirkjunnar. Var hún fyrsta konan til að hljóta þá nafnbót.

Heilagur Jón af krossinum (San Juan de la Cruz 1542 - 1591) var samherji Teresu. Hann var eitt fremsta ljóðskáld Spánverja, dulhyggjumaður og guðfræðingur. Eftir nám og prestsvígslu gekk hann til liðs við siðbótarhreyfingu í kaþólsku kirkjunni. Hann lenti í fangelsi og ritaði þar sum sinna fegurstu ljóða. Jón bjó yfir djúpu ljóðrænu næmi en kunni jafnframt að beina hugsun sinni eftir þröngum rökfræðilegum brautum heimspeki og guðfræði síns tíma. Hvort tveggja er talið einkenna rit hans. Hann er einn af doktorum kirkjunnar ásamt Teresu. Jón komst í safn heilagra árið 1726.