Eina kollaleiru, takk!

Í gær drakk ég kaffi með sr. Patrick presti kaþólskra á Akureyri og næstu nágrennum og kapútsínamunkinum bróður Davíð. Þetta eru einstakir öndvegismenn. Bróðir Davíð er frá Slóvakíu en talar furðugóða íslensku miðað við hversu stuttan tíma hann hefur dvalið hér á landi. Ég hjálpaði honum aðeins með verkefni sem hann var að vinna um Íslendingasögurnar. Í staðinn ætlar hann að spjalla við okkur um heilagan Frans og klausturlíf á kirkjulistaviku í Akureyrarkirkju í byrjun maí næstkomandi.

Kapútsínar eru að stofna klaustur á Kollaleiru í Reyðarfirði. Mér finnst það ekki síðra fagnaðarefni en álverið, enda fyrsta munkaklaustur á Íslandi frá því eftir siðbót. Einkar vel fer á því að hafa klaustur á stað sem heitir Kollaleira. Ég sé fyrir mér leirlitaða kolla á krúnurökuðum munkum þótt auðvitað séu það bara fordómar að halda að allir munkar séu þannig til hársins.

Kapútsínar rekja sig aftur til heilags Frans. Reglan varð til árið 1520. Upphafsmaður hennar, Matteo da Basico, var af Mörkum á Ítalíu. Honum fannst þáverandi regla fransiskana hafa fjarlægst nokkuð áherslur heilags Frans. Nafn sitt fengu kapútsínar af því að þeir höfðu hettu (capuche á ítölsku) á kuflum sínum. Sá ágæti ítalski kaffidrykkur, kapútsínó, dregur svo heiti sitt af reglu kapútsína. Brúni liturinn á kuflum þeirra þykir sá sami og á kaffi þeirrar gerðar.

Auk þess geri ég að tillögu minni að kapútsínó verði hér eftir nefnt kollaleira á íslensku. Liturinn á slíku kaffi minnir á leirlitað jökulvatn og svo hefur það þennan fallega hvíta koll.

Að lokum má minna á að Ítalir sloka aldrei í sig kollaleiru eftir kl. 11 árdegis.

Athugasemdir

[Steinunn Helga Sigurðardóttir, 23.3.2007 kl. 05:08]

ég tók viðtal við munk frá reglu heilags Frans frá Assisi. Hef verið svolítið að skoða teksta um  Frans frá Assisis. ég varð fyrir voðalegum vonbrigðum með þennann munk ! En ég var sennilega bara óheppinn.

ljós til þín frá Lejre

Steina 

[Pétur Björgvin, 23.3.2007 kl. 09:43]

Gaman að heyra af þessu samstarfi!

[Árni Svanur Daníelsson, 23.3.2007 kl. 10:54]

Þetta finnst mér bráðsnjöll hugmynd!

[David Tencer (IP-tala skráð) 26.3.2007 kl. 11:20]

Sæl og blessuð, Helga, David heiti ég og ég er kapúsína bróðir sem talaði við séra Svavar. Í svarinu á blogg sr. Svavars skrifar þú: Ég varð fyrir voðalegum vonbrigðum með þennann munk..." Mig langar að spyrja, við hvern munk varst þú að tala? Af því að við erum hérna á Islandi bara tveir og br. Anton tala hvorki íslensku, né ensku og ég man ekki, að við töluðum saman. En í saman tíma, ef ég var þessi munkur, ég bið fyrirgefningu fyrir mig. Ef það var einhver frá reglu okkar, eg bið fyrirgefningu fyrir hann.Ef þú vilt að vera í sambandi við mig, simanúmer mitt er 8978563. Takk fyrir og Guð blessi Þig. David

[David Tencer (IP-tala skráð) 26.3.2007 kl. 11:41]

Sr. Svavar, takk fyrir hjálp með íslendingasögunum, Guð blessi þig

[Svavar Alfreð Jónsson, 26.3.2007 kl. 14:55]

Kæri bróðir Davíð!

Steinunn Helga er búsett í Danmörku og munkurinn sem hún minntist á er ábyggilega þar í landi. Ég hafði bara gaman og gagn af því að fást við Íslendingasögurnar. Þakka kærlega kveðjuna og heimsóknina á síðuna mína.

Pax et bonum!

Svavar

[Steinunn Helga Sigurðardóttir, 27.3.2007 kl. 14:18]

Kæri Davið, við höfum nú talað saman í síma um þetta, en finn að ég hef þörf fyrir að svara hérna þar sem ég skrifaði þessi skilaboð. þessi munkur er í hróaskeldu. vonbrigði mín fólust í því að ef ég hefði ekki sjálf lesið um Frans frá Assisi, þá hefði það sem hann sagði ekki verið til að kveikja áhuga minn á þessum merka manni.þegar ég fór frá þessum fundi fann ég og sú sem var með mér hverning vonbrigðin helltust yfir okkur. en við tókum bjartsýni okkar upp á ný, og þar sem við höfðum keypt nokkara bækur og netið er fullt af fróðleik um FA , sáum við að við gætum alveg gert þessa grein á viðtalsins.

kæri davið ég hef mikla virðingu og þakklæti  til þeirra sem vinna á Guðs vegum á meðan það er gert með Kærleikanum, og ég veit að það er það sem þið gerið. þið helgið lífi ykkar þessum boðskap. ég sendi Kærleika og Ljós til þín og óska þér og hinum munkinum alls hins besta.

steina