Senigallia og Urbania

Enn hef ég ekki nefnt tvo skemmtilega staði í góðu ökufæri við Hotel Sole á Mörkum. Þar er annars vegar nágrannabærinn Senigallia, afburða vinsæll baðstaður, frægur fyrir sínar flauelsmjúku sandstrendur. Auk þess er þar mikið um gamlar og fagrar byggingar.

Hins vegar er bærinn Urbania við ána Metauro, sem rennur í Adríahafið ekki langt frá Marotta. Þar er stórglæsileg höll, Palazzo Ducale. Það forvitnilegasta er samt Cimitero della Mummie í kirkjunni Chiesetta dei Morti. Þar hanga eins og þvottaplögg á snúru tólf þurrkuð lík í þar til gerðum glerskáp. Múmíurnar hafa verið þar frá því þær fundust árið 1813 í mjög sérstökum jarðvegi sem geymdi þær vel. Að sögn kunnugra hefur kirkjuvörðurinn ekkert nema ánægju af því að opna skápana fyrir gesti og veitir það honum sérstaka gleði að geta sýnt líkið með stungusárið eða ófrísku konuna með fósturmúmíuna. Í ferðabókum er fullyrt að börn hafi voða gaman af þessu en mér þykir lýsingin benda til þess að heimsókn í þessa kirkju sé ekki fyrir viðkvæmar sálir.

Athugasemdir

[Steinunn Helga Sigurðardóttir, 3.4.2007 kl. 05:19]

ljós frá mér

steina 

[Yrsa Hörn Helgadóttir (IP-tala skráð) 3.4.2007 kl. 20:24]

Oh! þetta er fyrir mig, það fer bara um mig ferðahrollasæluunaðseinhvertilfinning. Kveðja úr stapasíðunni og sjáumst í ausu:-)YHH