Autostrada & uscita

Þar sem við Akureyringar munum einkum notast við bíla til að komast milli staða úti á Ítalíu í sumar kemur hér ein færsla með hollráðum þar að lútandi.

Hraðbrautirnar á Ítalíu nefnast autostrada (fleirtala autostrade). Greiða þarf fyrir akstur á þeim. Hámarkshraðinn þar er 130 km pr. klukkustund en lægri á sérstökum svæðum.

Venjulega er ekið lengst til hægri á autostrada en tekið fram úr á næstu akgrein til vinstri. Ítalir geta orðið dálítið æstir í umferðinni og hika til dæmis ekki við að senda þeim tóninn sem slóra á akgreinum til vinstri.

Innheimtustöðvar fyrir vegagjald eru á hraðbrautunum. Þegar þær nálgast á að fylgja skiltum sem sýna ökuþór greiða afgreiðslumanni. Skilti með peningum vísar yfirleitt á peningasjálfsala en einnig er hægt að borga með greiðslukortum.

Vilji menn spara sér vegagjaldið á að vera hægt að finna vegi merkta "SS" sem oftast liggja því sem næst samhliða autostrada. Þar er um að ræða svokölluð ríkisstræti, strade statali. Hámarkshraðinn á þeim er á bilinu 90 - 110 km en 30 - 50 nálægt þéttbýli. Strade statali eru þrengri vegir en autostrade en oft er af þeim betra útsýni.

Autostrade eru merkt með "A" og oft kemur númer hraðbrautarinnar á eftir, allt á grænum grunni. Aðrir akvegir eru auðkenndir með veganúmerum á bláum fleti.

Uscita er skemmtilegt orð sem oft sést þegar ekið er eftir ítölskum hraðbrautum. Í fyrri Ítalíuferðum fjölskyldunnar heyrðist oft "út að skíta!" frá krökkunum aftur í þegar skilti með þeirri áletrun birtist. Orðið þýðir afrein eða útgangur. Uscita á autostrada bendir á leið til að aka út af hraðbrautinni. Uscita di sicurezza á börum og þvílíkum stöðum þýðir neyðarútgangur. Komir þú að skilti sem á stendur via senza uscita merkir það að þú sért á blindgötu. Það hendir margan góðan drenginn.

Athugasemdir

[Baldur Kristjánsson, 4.5.2007 kl. 18:44]

Ég sé að börnin hafa erft kímnigáfu föðurins. Gangi ykkur vel í ferðinni og fariði varlega. Ég myndi aka sparakstur. Kv.

[Haukur Viðar, 4.5.2007 kl. 19:23]

Hahaha

[Jóna Á. Gísladóttir, 4.5.2007 kl. 20:20]

Snilld minn kæri Ítalíu-mógúll.

[Þorgerður (IP-tala skráð) 5.5.2007 kl. 00:11]

Þeir eru þá eins og Bretarnir, ansi óumburðarlyndir í umferðinni. Þú bara sendir þeim tóninn til baka ;)

[Hjalti Rúnar Ómarsson, 7.5.2007 kl. 00:37]

"Uscita de sicurezza"

Þú klikkaðir líka á di-inu í ísfærslunni (og bættir reyndar líka i-i í gusto) en hérna settirðu inn mynd þar sem di-ið sést klárlega. 
Ef til vill áhrif frá spænsku?

"senza uscita"

En: Sbagliando s'impara!

[Svavar Alfreð Jónsson, 7.5.2007 kl. 09:27]

Þakka Hjalta ábendingarnar. Vitleysurnar skrifast á fákunnáttu mína og klaufaskap en ég hef þegar leiðrétt þetta. Ég kann enn minna fyrir mér í spænsku en eins og Hjalti bendir á er ekki útilokað að æfingin skapi meistarann.