Fyrirmyndargelgjan Egill Skallagrímsson og Ein með öllu

Nauðganir, sala og neysla á eiturlyfjum, barnafyllerí og skemmdarverk. Þessa dagana reyna öflug fyrirtæki, fjölmiðlar og jafnvel heilu sveitarfélögin að telja okkur trú um að þessi ómenning sé sjálfsagður fylgifiskur svokallaðra fjölskylduhátíða um verslunarmannahelgina og hluti íslenskrar þjóðmenningar. Þeir sem andæfa eru nöldurseggir. Postular neikvæðninnar. Sérvitringar.

Um síðustu verslunarmannahelgi var stúlkum nauðgað á fjölskylduhátíðinni á Akureyri. Af 100 fíkniefnamálum sem upp komu á landinu þessa helgi voru 66 á Akureyri. Á þriðja hundrað manns komu á slysadeild Fjórðungssjúkrahússins. Um 30 bílar voru skemmdir. Fjölmörg spellvirki voru unnin á eignum íbúanna og bæjarins.

Þá eru ótalin skemmdarverk á óhörðnuðum unglingum og börnum, á bernsku og æsku þessa lands. Þau bæta engin tryggingafélög.

Heldur ekki orðspor bæjarins og ímynd.

Þeir eiga að þegja sem sjá eitthvað neikvætt við þessa ómenningu. Þeir mega standa úti í kuldanum. Reynt er að fá sem flesta í þetta samsæri þagnarinnar. Allt skal vera gott á Akureyri, líka siðleysið. Bæjarstarfsmaður sagði mér að í fyrra hefðu ýmsar eignir bæjarins verið skemmdar en alls ekki hefði mátt segja þá sögu alla. Þrýst var á fjölmiðla að tala bara um það jákvæða. Meira að segja veðurfræðingarnir voru undir pressu. Veðrið átti líka að vera svo ofboðslega hagstætt.

Það sem ekki reyndist unnt að hylja með þögninni var lagt á skurðarborð fegrunarlæknisins. Þær aðgerðir forsvarsmanna hátíðarinnar gátu orðið skrautegar. Ég vitna í frásögn blaðamanns Reykjavík Grapevine um fjölskylduhátíðina í fyrra:

"In response to complaints from many local townspeople concerning several acts of petty vandalism and violence over the weekend, (approximately 30 automobiles were damaged), Bergmann responded that Icelanders are "used to partying hard", that it was in their blood, citing Egill Skallagrímsson as the nation´s first reported drunken teenager."

Það útskýrir margt þegar aðstandendur Einnar með öllu tilgreina sjálfan Egil Skallagrímsson sem upphafsmann hinnar þjóðlegu unglingadrykkju.

Myndin með þessari færslu er úr umfjöllun Reykjavík Grapevine um Akureyri verslunarmannahelgarinnar. Undir myndinni hefðu mátt standa lógó þeirra fyrirtækja sem standa að Einni með öllu. Við sjáum þau bara fyrir okkur. Ásamt merki Akureyrar.

Athugasemdir

[Jóna Á. Gísladóttir, 26.7.2007 kl. 17:47]

Já, þetta er smart . En hvað er til ráða? Hvernig í ósköpunum getur svona hátíð skilað svo miklu í kassann að forsvarsmenn séu tilbúnir til að selja sálina og æruna til að halda andlitinu út á við. 

[Gunnar Helgi Eysteinsson, 26.7.2007 kl. 23:04]

Græðgin stýrir heiminum...

[Sigrún Einars, 27.7.2007 kl. 11:03]

Ég sýni hverjum sem er hiklaust og hikstalaust vandlætingu mína á því að leyfa börnum sínum að fara á slíkar samkomur og ég tala nú ekki um Vestmannaeyjaningana sem fara með börnin sín með sér á Þjóðhátíð!!  Og ef fleiri myndu gera það myndu enn fleiri hugsa sig tvisvar um áður en þeir gæfu unglingunum sínum grænt ljós eða pökkuðu niður svefnpokum barnanna sinna.  ÞANNIG hægjum við á þessari þróun, með því að láta í okkur heyra þegar eitthvað er EKKI allt í lagi. 

Fór sjálf á svona uppákomu, einu sinni á ævinni, 16 ára gömul og hef ALDREI farið síðan.  Það sem ég lenti í þar var svo svakalegt að mig LANGAÐI EKKI til að fara aftur.  Hefði samt óskað þess að foreldrar mínir hefðu ekki leyft mér að fara, ég vil frekar lifa með söknuðinum yfir að hafa ekki upplifað eitthvað frekar en hörmulegum minningum um ömurlega lífsreynslu. . . .

Foreldrar, gerið börnunum ykkar það að BANNA ÞEIM að fara, þannig sýnið þið ást ykkar á þeim