Bæjaryfirvöldum á Akureyri klappað

Sú ákvörðun bæjaryfirvalda á Akureyri að veita fjölskyldufólki forgang að tjaldsvæðum bæjarins er á margan hátt skiljanleg. Verið er að senda skýr skilaboð um að hátíðin Ein með öllu sé fjölskylduhátíð. Ekki er víst að pláss sé fyrir alla gesti hátíðarinnar á tjaldsvæðunum og ekki nema eðlilegt að fjölskyldufólk sitji fyrir á fjölskylduhátíð.

Þar að auki hafa verið mikil vandræði á tjaldsvæðunum undanfarin ár. Mér þykir sennilegt að ákvörðun bæjaryfirvalda hafi verið tekin í samráði við þá sem reka tjaldsvæðin. Þeir vita hvaða aldurshópar hafa verið erfiðastir þessa helgi - þótt alls staðar séu svartir sauðir. Bæjaryfirvöld hafa ábyggilega ekki sett þessi aldursmörk vegna þess að þeim sé illa við tiltekna hópa fólks.

Ég verð samt að standa undir nafni sem postuli neikvæðninnar og benda á nokkuð sem mér finnst aðfinnsluvert í þessu máli.

Þessi ákvörðun kemur of seint. Búið er að höfða til fólks á aldrinum 16 - 23 ára um að drífa sig til Akureyrar. Það á að vera frægur dídjei í Sjallanum á föstudagskvöldinu. Laugardags- og sunnudagskvöld verða unglingadansleikir í KA-heimilinu, fyrir 16 ára og eldri, til kl. þrjú um nóttina.

Viðbúið er að einhverjir á þessum aldri hafi verið búnir að ráðgera ferð til Akureyrar með gistingu á tjaldsvæði í huga. Þetta fólk verður auðvitað fyrir vonbrigðum. Kannski taka líka einhverjir sénsinn og koma norður án þess að eiga von í nokkru húsa- eða tjaldskjóli. Það gæti haft verulega erfiðleika í för með sér.

Nær hefði verið að stilla betur saman strengina og gefa til kynna strax frá upphafi hvers konar hátíð Ein með öllu á að vera. Vonandi verður það gert næst.

Ég vona svo sannarlega að hátíðin gangi vel fyrir sig og trúi því einlæglega að hægt sé að halda fjölskylduhátíðir á Akureyri og Íslandi án þess að upp komi tugir fíkniefnamála eða konum sé nauðgað.

Það styrkir mann í þeirri trú að hér í bænum eru haldin fjölsótt fótboltamót á hverju sumri. Þangað kemur fólk, einkum fjölskyldur, í þúsundavís. Ég veit ekki betur en að þær samkomur hafi gengið prýðilega. Þá má geta þess að undanfarin ár hef ég verið viðstaddur lokahátíð Einnar með öllu á íþróttavellinum. Það hafa verið mjög skemmtileg kvöld og laus við hvers konar villimennsku. Þetta er hægt.

Ef til vill verður það enn til að glæða aðsókn að hátíðinni í ár að postuli neikvæðninnar verður ekki í bænum um helgina. Hann mun á hinn bóginn reyna að beina jákvæðum straumum í bæinn sæta við Pollinn.

Svo bið ég kærlega að heilsa honum Braga mínum ef einhver lesenda minna skyldi rekast á hann hátíðardagana. Ég er meira en fús til að hjálpa honum við að gera Eina með öllu að fjölskylduhátíð sem stendur undir nafni.

 

Athugasemdir

[Sölvi (IP-tala skráð) 31.7.2007 kl. 19:02]

Góðan dag,

Ég var að vellta fyrir mér þegar ég heyrði þessa auglýsingu í útvarpinu að það ætti að meina unglingum á aldrinum 18-20 ára aðgang að tjaldsvæðum. Þetta er að sumu leiti gáfulegt en þetta finnst mér ekki réttlætanlegt. Tökum dæmi ef ég væri að stofna veitingarhúsnæði hérna á akureyri þá eru alskonar ráðstafanir sem þarf að pæla í t.d. hurðin sem maður gengur inn um verður að vera stærri en 2 metrar því hávaxið fólk getur rekið hausinn í, það þarf líka að vera fatlaða aðstaða svo fólk í hjólastól geti notað salernið. Ef Akureyrarbær væri að byggja þennan stað hvað mundu þeir gera? mundu þeir ekki bara meina fólki hærra en 2 metrar aðgang og fötluðum líka? Fólk af afrísku bergibrotnu í bandaríkjonum er í meirihluta þeirra sem ræna veitingastaði og verðslanir á þá bara að meina þessu fólki aðgang? af því að það er hagstæðara og skapar meiri öryggji gagnvart öðrum. Unglingar sem eru að fara til Akureyrar langar að koma hér með félögum sínum og hafa gaman af en svo virðist sem þetta fólk sé ekki velkomið. Það eru unglingar sem eru með læti en það eru þrátt fyrir það ekkert "allir" unglingar. Þetta þykir mér vera hneiksli og ég veit að það yrði allt brjálað ef Akureyrarbær mundi banna fatlaða, öryrkja og fólk yfir 2 metrar til að koma á einhver ákveðin svæði. Það á bara að herða gæslu ef þetta á að vera vinsæll áfangastaður ekki meina fólki aðgang. Það er eins og það sé litið niður á unglinga því þeir eru nýliðar í þessu samfélagi en ef þið fullornu sem eruð að stjórna bænum og samfélaginu meinið okkur aðgang þá eigum við ekkert eftir að vera umburðalyndari þetta er ekki leiðin til að taka á vandanum þið eruð bara að færa hann eitthvert annað. Mér persónulega þykir þetta vera glötuð framkvæmd og ef ég væri að stjórna þessu þá kæmi ég með betri úrkosti en þessa. Þetta setur stóran blett á bæjin okkar og ég vil bara segja öllum unglyngum þarna úti komið til akureyrar og tjaldiði bara á umferðareyjum fyrst þessi stjórn kemur með svona hræðilegar ákvarðanir.

[krossgata, 2.8.2007 kl. 13:53]

Mér finnst alltaf merkilegt að heyra allar "hátíðirnar" um verlsunarmannahelgina kallaðar fjölskylduhátíðir.... þegar um áratugaskeið þær hafa ekki verið til að þjappa fjölskyldum saman nema síður sé og helgin notuð til að blóta bakkus í miklum móð með öllum þeim vandamálum sem því fylgir.  Sundrungarhelgin gengur nú í garð og allir fá frí nema verslunarmenn og meira að segja Mogginn kemur ekki út.... (kom ekki út síðustu verslunarmannahelgi)... sem er viðeigandi á annari eins helgi, sambærilegt við jól og páska er það ekki?