En vandamálin eru jú verkefni

Bæjarfulltrúi nokkur á Akureyri segist líta á Eina með öllu sem verkefni en ekki vandamál.

Nauðganir, 66 upplýst fíkniefnamál, unglingadrykkja, slagsmál, ofbeldi, skemmdarverk (m. a. 30 bílar) og á þriðja hundrað gesta á slysadeild Fjórðungssjúkrahússins meðan Ein með öllu stóð yfir í fyrra eru m. ö. o. verkefni. Ekki vandamál. 

Shit happens.

Og nú eru menn búnir að finna það út að bæjaryfirvöld á Akureyri séu að brjóta lög með því að setja 23ja ára aldurstakmark á tjaldsvæði bæjarins.

Að sjálfsögðu eigum við fara að lögum og settum reglum. Byrjum á lögreglusamþykkt Akureyrar, en þar segir m. a.:

"Bannað er að aðhafast nokkuð það, sem veldur ónæði eða raskar næturró manna." (1. gr.)

"Öllum ber að gæta þess að ganga vel um á almannafæri og skemma þar ekki hluti eða færa þá úr stað, sem ætlaðir eru til almenningsnota eða prýði.... Þess skal gætt að troða ekki ræktaða bletti, grasreiti, blómabeð og limgerði á almannafæri og bannað er að slíta þar upp gróður." (6. gr.)

"Enginn má án leyfis húsráðanda láta fyrir berast á eða í húsi hans, á lóðum eða á girðingum, sama á við um þessa staði og aðra sambærilega ef lögreglan bannar það, enda verði það talið geta valdið óþægindum eða hættu." (7. gr.)

"Í samræmi við ákvæði heilbrigðisreglugerðar, nr. 149/1990, er bannað að skilja eftir, flytja eða geyma úrgang á þann hátt að valdið geti skaða, mengun eða lýti á umhverfinu." (8. gr.)

Í reglugerð um hollustuhætti nr. 941/2002 segir ennfremur:

"Við staðsetningu og rekstur tjald- og hjólhýsasvæða skal þess sérstaklega gætt að þeir sem þar dvelja verði ekki fyrir ónæði sem getur stafað frá umhverfinu. Enn fremur skal þess gætt að ónæði berist ekki frá svæðinu til nálægra íbúa."

Það er hvorki gestum né íbúum bæjarins til góðs að láta viðgangast að reglur þessar séu mölbrotnar.

 

Athugasemdir

[Jón Ingi Cæsarsson, 3.8.2007 kl. 08:41]

Það er spurning hvað og hverjir eru vandmál. Yfirlýsing Odds er sorglegur poppulismi og vanhugsuð. Það er slæmt þegar menn axla ekki ábyrgð og þykjast ekkert vita.

Ein með öllu er verkefni.... þess vegna er eitt verkefnið að takast á við vandamálin....en það gerir Oddur ekki..heldur kýs að þvo hendur sínar á kosnað fjölskyldu og barnafólks í bænum og á tjaldsvæðum bæjarins.

[Baldvin Esra Einarsson (IP-tala skráð) 3.8.2007 kl. 11:04]

Er ekki tilgangur yfirlýsingar Odds að benda á að þegar öllum yngri 23 ára er bannað að tjalda á tjaldsvæðum er verið að setja skorður á hóp lögráða einstaklinga út frá forsendum sem eiga við lítinn hluta þeirra sem tilheyra þessum hópi, þ.e. allir undir 23 ára-hópurinn.

Og hvað með þá sem eru rotin epli og eldri en 23 ára. Þeir eru enn vandamál. Þessi lausn er yfirborðsklór og skilar engum árangri. 

Vandinn er ekki að þetta lið (sem ber ábyrgð á nauðgunum, ofbeldi, eiturlyfjaneyslu, skemmdarverkum og almennum skrílslátum) skuli haga sér svona á Akureyri, heldur er vandinn að þessi skríll skuli haga sér svona yfir höfuð. Og hann mun haga sér svona þessa helgi, hvort sem það er á Akureyri eða í Eyjum eða einhverstaðar annarsstaðar.

Að vilja losna við þetta úr bænum er bara tilfærsla á vanda og engum til góðs. Það slær mig svolítið að sóknarprestur Akureyrarkirkju skuli hafa jafn einfalt viðhorf til þessara mála.

[Ingimar Björn Davíðsson, 3.8.2007 kl. 11:54]

Ég er sammála Baldvini Esra í þessu máli. Þetta er álíka fáránlegt og sú regla að samkynhneigðir menn megi ekki gefa blóð vegna þess að sumir þeirra eru með HIV smit. Bæði þeir sem eru yfir og undir 23 ára aldrinum geta verið með óspektir og læti og af minni reynslu að dæma eru það síst unglingarnir sem valda mestum vandræðum. Þegar ég var sjálfboðaliði hér í denn á tjaldsvæði Skáta í Kjarnaskógi á Halló Akureyri fannst mér eldra fólkið mun verra og óstýrilátara en unglingarnir sem yfirleitt voru besta fólk. Auðvitað finnast skemmd epli inn á milli, en í því samhengi get ég ekki ímyndað mér að skipti nokkru máli á hvaða aldri viðkomandi er. Betri og strangari gæsla með "zero-tolerance" gagnvart látum og skrílshætti er eina leiðin sem ég sé færa.

En á meðan þarf saklaust ungt fólk að láta koma fram við sig eins og aula og glæpamenn. Það er ekki líðandi.

[Svavar Alfreð Jónsson, 3.8.2007 kl. 12:19]

Baldvin Esra: Í fyrra fengu aðeins útlendingar og þeir sem voru með tjaldvagna eða hjólhýsi að tjalda við Þórunnarstrætið. Mér er sagt að á Laugarvatni sé allt upp í 30 ára aldurstakmark á tjaldsvæðinu og á Hrafnagili hérna frammi í firði verður miðað við 20 ár. Þar að auki verður því fólki vísað frá sem hefur eitthvað annað í hyggju en að eiga rólega helgi með fjölskyldunni eins og það er orðað. Það eru því engin nýmæli að yfirvöld setji reglur um það hverjir skuli hafa aðgang að tjaldsvæðum. Ég veit að bæjaryfirvöld settu þessar reglur að viðhöfðu samráði við þá sem reka tjaldsvæðin. Þeir vita hvaða hópar hafa verið til mestra vandræða. Veist þú eitthvað sem þeir vita ekki?

Um verslunarmannahelgina í fyrra var konum nauðgað á Akureyri, unnin mörg skemmdarverk, upp komu 66 fíkniefnamál (af 100 á landinu öllu þessa helgi) yfir 200 manns leituðu á slysadeild FSA. Stórfellt barnafyllerí var í bænum.

Þú segir að ég hafi "einfalt viðhorf" til þessara mála. Af hverju? Er ekki miklu meiri einfeldni að segja: Það þýðir ekkert að berjast gegn nauðgunum á AKureyri, því þá fara nauðgararnir bara eitthvað annað. Það þýðir ekkert að banna börnunum að drekka heima hjá sér því þá fara þau bara eitthvað annað. Er það ekki einmitt háttur einfeldningsins að líta ekki í eigin barm? Tala fjálglega um gildi fallegra garða en láta sinn eiginn drabbast niður?

Hvað væri það kallað ef prestur á Akureyri færi að tala gegn sukkinu í Eyjum en lokaði báðum augunum fyrir svínaríinu í sínum eigin sóknum?

Gæti maður ef til vill kallað það hræsni?

[Svavar Alfreð Jónsson, 3.8.2007 kl. 12:59]

Ingimar: Um verslunarmannahelgina í fyrra voru sérstök unglingatjaldsvæði úti í Þorpi. Af hverju er sá háttur ekki hafður á núna? Hvor skýringin á því er sennilegri að bæjaryfirvöldum sé sérstaklega í nöp við þennan hóp fólks eða að hrikaleg umgengni á Þórssvæðinu í fyrra hafi leitt til þessarar ákvörðunar?

Þú talar líka um betri og strangari gæslu. Af hverju segir björgunarsveitin Súlur sig frá gæslu þetta árið?

Það er heldur ekki alveg rétt að öllum innan 23ja ára aldurs sé bannað að slá upp tjöldum á Akureyri þessa helgi. Fólk á þessum aldri sem tilheyrir fjölskyldum er velkomið. Ein með öllu á að vera fjölskylduhátíð.

Skilaboð um það hafa á hinn bóginn ekki verið nógu skýr, hvorki núna né undanfarin ár. Ákvörðunin um þessi aldursmörk hefðu átt að koma fyrr og ef til vill hefði ekki þurft að grípa til þessara hörðu aðgerða ef menn hefðu vandað sig betur við skipulag og kynningu á hátíðinni.

Það er alveg hárrétt að of stór hluti fullorðinna Íslendinga kann ekki að skemmta sér. Á því þarf vissulega að taka. Topparnir í fíkniefnaveröldinni eru líka fæstir yngri en 23ja ára. Ekki er nóg að hækka aldurstakmörk á tjaldsvæðum til að stoppa þá. Til þess þarf önnur meðul. Vonandi gefur þessi umdeilda ákvörðun bæjaryfirvalda á Akureyri til kynna að þau séu farin að sjá að ótalmargt þarf að laga við skipulag og framkvæmd Einnar með öllu - eigi hún að flokkast sem fjölskylduhátíð.

[Aðalheiður Magnúsdóttir, 3.8.2007 kl. 15:09]

Ég held að við leysum ekki þennan vanda á blogginu, ekki heldur með því að vera með aldurstakmark á tjaldstæði. Hvað verða mörg tjöld í húsagörðum og á litlum grænum blettum í kringum bæinn. Kannski við þökkum bara fyrir að veðurspáin er ekki spennandi þannig að fólk kemur kannski ekki til að tjalda hér þetta árið. Þá verðum það bara við Akureyringar sem málum bæinn rauðan

[Baldvin Esra Einarsson (IP-tala skráð) 3.8.2007 kl. 17:48]

Aðalheiður: Við gætum eflaust lagt grunn að lausn vanda á borð við þennan með umræðu og blogg er ágætis umræðuvettvangur sé hann ekki misnotaður. En það er samt hárétt hjá þér, vandinn verður ekki leystur með yfirborðslegu banni á tjaldstæði og það er einmitt það sem ég hef verið að benda á.

Svavar: Ég er ekki að segja að "Það þýðir ekkert að berjast gegn nauðgunum á AKureyri, því þá fara nauðgararnir bara eitthvað annað. Það þýðir ekkert að banna börnunum að drekka heima hjá sér því þá fara þau bara eitthvað annað."

Ég er að segja að ef lausnin er að banna einhverjum ákveðnum aldurshópi að tjalda á Akureyri er vandinn bara færður til. Fólk sem ætlar sér að verða ofurölvi og gera allskyns viðbjóð af sér um þessa helgi mun það gera það hvar sem það verður. Málið er að fá fólk ofan af því haga sér svona. Það mun án efa skila árangri að berjast gegn nauðgunum á Akureyri. En það mun ekki skila árangri að berjast gegn nauðgunum á Akureyri ef þeim hópi af einstaklingum sem eru líklegastir til að fremja slíka glæpi eru á Neskaupstað eða í Eyjum vegna þess að þeir gátu ekki tjaldað á Akureyri.

Svo er örugglega betra að hafa hóp af ungmennum á fylleríi á einu tjaldsvæði þar sem gott eftirlit er til staðar (lögregla, hjálparsveitir, skátar og foreldravaktir) en í görðum og grasblettum á víð og dreif um bæinn þar sem ekkert eftirlit er til staðar.

Svo má heldur ekki misskilja mig, ég er ekki hér til að styðja "fjölskylduhátíðina" Eina með öllu. Að mínu mati er þetta árás á okkar prýðilega bæ og fer ég ávallt úr bænum um þessa leiðinlegu helgi. Hins vegar á Akureyrarbær ekki að vera svo fullur af hræsni að leyfa hátíðina en banna öllum yngri en 23 ára að tjalda á tjaldsvæðinu. Bærinn á að taka ábyrgð á því sem þeir leyfa.

Ég veit það nefnilega (eins og fleiri) að unglingadrykkja, sóðaskapur, ofbeldi, fíkniefnamisferli og nauðganir munu eiga sér stað á Akureyri um helgina vegna þess að það er skipulögð dagskrá þar um helgina. Hvort sem hún er fjölskyldumiðuð eður ei. Annaðhvort á að slökkva á þessu komplett eða finna leið til að komast hjá því að fólk hagi sér eins og villimenn. 

[Aðalheiður Magnúsdóttir, 4.8.2007 kl. 19:23]

Baldvin: Ég get tekið undir vel flest sem þú segir nema ég held mig í bænum meðan þessi ósköp ganga yfir og held utan um mig og mína