Hvað keyptirðu í útlöndum?

Nú er tími borgarferðanna. Þær eru miklir afkastaleiðangrar. Verslanir nálægt helstu flugvöllum í Evrópu og Norður-Ameríku standa auðar og tómar eftir þessar heimsóknir frá Íslandi, líkt og Írlandsstrendur forðum þegar víkingarnir höfðu farið þar yfir.

Ég hef sjálfur farið í verslunarferðir með dágóðum árangri. Það er hægt að kaupa helling af alls konar drasli fyrir lítinn pening í erlendum búðum. Oftast er megnið af því hégómi og óþarfi.

Þó að maður fari ekki beinlínis til útlanda þeirra erinda að kaupa sér eitthvað er oft reiknað með því að einhver búðavarningur sé í töskunum þegar heim er komið. Manni finnst tilheyra að kaupa eitthvað í utanferðum. Handa sjálfum sér og öðrum. Sá sem ekki gerir einhver góð kaup í útlöndum kann ekki að ferðast. Hann hefur farið hálfgerða fýluferð og hefur ekkert að sýna þeim sem heima sátu.

Þetta hefur alltaf verið svona. Þegar hinn sæli Þorlákur biskup kom úr sinni námsferð til Parísar og Lincoln var hann með sama gamla lítillætinu og "eigi hafði hann sótt skart eða þessa heims skraut sem margur sá annar er minni fremd og gæfu sækir í sinni brottferð" segir í Þorláks sögu helga. Þar er þessi kaupárátta okkar til umræðu, sú "margra manna siðvenja að þeir búast þá vandlegar vopnum og klæðum er þeir koma út úr för".

Ekki hirti Þorlákur helgi um slíkt og var góð fyrirmynd í því sem og í öðru. Í sögu hans er sagt að hann hafi haft "sér að fararblóma lærdóm og lítillæti og marga góða siðu þá er hann sá í sinni ferð".

Mættu sem flestir uppskera þess konar fararblóma í borgarferðum hausts og aðventu.

 

Athugasemdir

[Greta Björg Úlfsdóttir, 15.10.2007 kl. 11:55]

Þetta var skemmtilegur fróðleikur. Ekki hafði ég gert mér grein fyrir að spurningin "hvað keyptirðu í útlöndum? (nútildags "erlendis")" ætti sér svo fornan uppruna. Ég er að vísu frekar á "Þorláksnótunum" og finnst skemmtilegra að fræðast um framandi staði en að versla, kaupi helst gjafir til þeirra sem heima sátu, en það er önnur saga.

[krossgata, 15.10.2007 kl. 13:14]

Mér finnst ágætt að taka bæði Þorlák og hina á ferðalögin.  Oft hreinlega fresta ég því að versla það sem mig vantar (sérstaklega vopn og klæði) ef ferðalag er í vændum og eðlileg afleiðing þess er að ég býst þá vandlegar vopnum og klæðum er ég kem út úr för.