Lækningar og kraftaverkalækningar

Í kjölsogið á umræðum um kukl og skottulækningar kemur enn einn þátturinn af hinum sæla Þorláki. Hann átti aldrei við góða heilsu að stríða, eins og kallinn sagði, "var aldrei allvel heill í sínum biskupsdómi", eins og það er orðað í Þorláks sögu helga.

Auk þess var honum mjög stirt um mál sem hlýtur að hafa komið sér illa fyrir mann í hans stöðu.

Enginn þarf að efast um að Þorlákur helgi hafi trúað heitt og innilega á kraftaverk enda urðu honum ýmis tilreiknuð eftir að hann hófst úr þessum heimi.

Þorlákur hafði líka trú á læknum þeirra tíma og álit hans á þeim er á margan hátt það sama og kirkjunnar í dag:

Guð er ekki einungis að verki í kraftaverkalækningum heldur líka í hinum hefðbundnu.

Það endurspeglast í þessum orðum úr Þorlákssögu:

"Aðgerðir lét hann lækna oft hafa að sér við sinni meinsemi og sýndi það að guð hefir til setta lækna að þeir skulu stundum mega að drottins vilja með skömmum sárleikum stöðva löng óhægindi."

Athugasemdir

[halkatla, 19.10.2007 kl. 08:37]

frábært

[Greta Björg Úlfsdóttir, 19.10.2007 kl. 13:12]

Það er mikil gæfa, sem ekki öllum hlotnast, því verr, að eiga við góða heilsu að stríða...

Ég tel ekki vafamál að guðlegur kraftur kemur við sögu þar sem farsæl lækning á sér stað, og að það sé til bóta að nútímalæknar geri sér grein fyrir því.

[DoctorE (IP-tala skráð) 19.10.2007 kl. 15:31]

Er það ekki hroki að telja sig og aðra verða læknaða af guði á meðan hundruð þúsunda barna deyja úr vel læknanlegum sjúkdómum og hungri, er það sanngjarn og algóður guð.
Þið hugsið þetta ekki til enda og slá út úr jöfnunni hina órannsakanlegu vegi

[Greta Björg Úlfsdóttir, 19.10.2007 kl. 15:46]

Það að hundruð þúsunda skuli deyja árlega úr læknanlegum sjúkdómum stafar fyrst og fremst af heimsku og kaldlyndi manna, en ekki því að Guð elski þau börn ekki jafn mikið og aðra menn. Lóðið er að hann vantar einfaldlega fleiri samverkamenn, en það er víst ennþá jafn erfitt fyrir auðmenn að komast í gegnum nálarauga nú og á dögum Krists, því miður, þó öll þessi ár séu liðin.

[DoctorE (IP-tala skráð) 19.10.2007 kl. 16:19]

Ok menn deyja vegna kaldlyndis og einstaka útvaldir læknast vegna góðmensku guðs... 2 + 2 = 5
Þetta auðmanna tal er bara tal yfirstétta sem stóðu að skrifum bókarinnar til lágstéttir væru í góðum fíling með að eiga ekkert

[Svavar Alfreð Jónsson, 19.10.2007 kl. 17:09]

Ég veit ekki alveg hvað dokksi er að fara en ef til vill telur hann að til að Guð geti talist sanngjarn og algóður þurfi allir að lifa nákvæmlega jafn lengi, jafn vel og deyja jafn góðum dauðdaga.

[Hjalti Rúnar Ómarsson, 19.10.2007 kl. 20:21]

Guðinn þinn hefði að minnsta kosti getað sleppt því að skapa alla þessa ógeðslegu sjúkdóma. Sköpunargleðin einum of mikil hjá honum, nema auðvitað að hann sé einfaldlega illur, eða bara ekki til.