Gagarín

Þegar sovéski geimfarinn Gagarín kom úr fyrstu mönnuðu geimferðinni hélt Krústsjov honum veglegt kvöldverðarhóf. Eftir að menn höfðu neytt matar og drykkja tók Krústsjov geimfarann afsíðis og spurði hann:

"Alveg okkar á milli, Gagarín, sástu hann, þú veist HANN, nokkuð þarna uppi?"

Gagarín hvíslaði í eyra leiðtogans: "Jú."

"Hálfpartinn grunaði mig þetta," sagði Krústsjov lágum rómi og mjög alvarlegur í bragði. Svo bætti hann við:

"En ekki orð um þetta við nokkurn mann!"

Nokkru síðar leiddi æðsti yfirmaður rússnesku rétttrúnaðarkirkjunnar geimfarann með sér út í horn og vildi fá að vita það sama:

"Alveg okkar á milli, Gagarín, sástu hann, þú veist HANN, ekki þarna uppi?"

Gagarín hristi höfuðið.

"Hálfpartinn grunaði mig þetta," muldraði guðsmaðurinn og bætti við áhyggjufullur:

"En í Guðs bænum ekki orð um þetta við nokkurn mann!"

Athugasemdir

[Ólafur fannberg, 26.10.2007 kl. 06:10]

Góður.

[krossgata, 26.10.2007 kl. 12:50]

 Er þetta jámaður allra tíma?

[Kristján Sigurður Kristjánsson, 26.10.2007 kl. 23:50]

Önnur saga segir að Gagarín hafi sagt: "Ég flaug upp í himininn en sá engan Guð". Prestur einn í Rétttrúnaðarkirkjunni ku hafa sagt: "Sá sem hefur ekki séð Guð á Jörðu mun ekki sjá hann á himmni".