Ófriður sé með yður

Við höldum að friður sé fólginn í rólegheitum. Friður er áreitaleysi. Friður er að vera látinn í friði. Friður er þögn og kyrrð.

Friður er suðið í boltalaga fiskiflugum í hrörlegri sveitakirkju í því sem næst yfirgefinni sveit.

Friður er kjötsviminn eftir steikina, unaðs- og ónotavíman sem færist yfir okkur þegar meltingarfærin komast á yfirsnúning.

Friður er nautnalyf, kannabis fólksins.

"Ekki gef ég yður eins og heimurinn gefur," segir Jesús.

Það á líka við um friðinn sem hann vill gefa okkur. Hann er enginn kjötsvima- og fiskiflugufriður.

Jesús vill ekki svæfa okkur, heldur vekja. Friður hans er andlegur kraftur, eldsneyti til lífs og starfs.

Friðurinn sem hann vill gefa okkur er ekki friður til að una sæll á sínum bás þar sem baulað er eftir næstu tuggu.

Friður Jesú Krists opnar sálarlásana og leysir okkur af básunum.

Sá sem þiggur þann frið getur ekki látið ófriðinn í friði.

Athugasemdir

[Gunnar Hrafn Jónsson (IP-tala skráð) 17.1.2008 kl. 21:30]

Hvaða rugl er það að bendla Jesú við boðun friðar? Hann sagði kannski ekki margt hreint út en hann sagði hreint út og skýrt að hann boðaði EKKI frið, þetta er úr Lúkasar guðspjalli:

51Ætlið þér, að ég sé kominn að færa frið á jörðu? Nei, segi ég yður, heldur sundurþykki. 52Upp frá þessu verða fimm í sama húsi sundurþykkir, þrír við tvo og tveir við þrjá, 53faðir við son og sonur við föður, móðir við dóttur og dóttir við móður, tengdamóðir við tengdadóttur sína og tengdadóttir við tengdamóður."

Hann segir hreint út: "ég færi EKKI frið", hvernig færðu annað út ef þú trúir á ritninguna?

[Svavar Alfreð Jónsson, 17.1.2008 kl. 22:40]

"Frið læt ég yður eftir, minn frið gef ég yður. Ekki gef ég yður eins og heimurinn gefur. Hjarta yðar skelfist ekki né hræðist," segir Jesús í Jóhannesarguðspjalli (14, 27).

Friðarboðskap Jesú Krists er ekki hægt að afgreiða með einu einstöku ritningarversi, Gunnar Hrafn.

[Zaraþústra, 17.1.2008 kl. 22:53]

Það er hægt að finna frið í helvíti ef maður leitar með sér.  En það er sjálfsagt auðveldara í sveitasælunni. :)

[Ólína Kjerúlf Þorvarðardóttir, 18.1.2008 kl. 10:35]

Góð hugvekja - takk fyrir hana.

[Greta Björg Úlfsdóttir, 19.1.2008 kl. 15:06]

Er það ekki einmitt stofusófa og sjónvarpsgláps, fiskiflugu-messu og helgarsteikar-kjötsvimafriðurinn sem Jesú mælir á móti að menn leyfi að svæfa í sér samviskuna, í ritningarversunum sem Gunnar Hrafn vitnar í, - á meðan hann talar um hinn eina sanna frið á jörðinni, sem leiðir af því að menn elska hvern annan í raun og sann, í því sem Svavar skrifar hér? Þannig skil ég að minnsta kosti þessa tvo texta.

[Eva Benjamínsdóttir, 24.1.2008 kl. 22:39]

Takk fyrir hugvekjuna séra Svavar.

Meðfylgjandi mynd sýnir dúfuna í nálægð með allan friðinn.