Svavar Alfreð Jónsson

15.4.2008 | 21:59

Ég býð í mat

Borðhald er ekki bara fólgið í því að borða.

Viðskiptamáltíðir eru gott dæmi um það. Rétt framferði manna við matarborð getur ráðið úrslitum um mikilvæga samningsgerð. Ekki að ástæðulausu hefur séntilmaðurinn Bergþór Pálsson tekið að sér að kenna viðskiptafólki borðsiði á svonefndu etiquette-námskeiði.

Góðrar máltíðar er best notið í hópi góðra vina. Þeir gera matinn enn betri. Samfélagið er Kryddið með stórum staf.

Það er mikil kúnst að bjóða vinum sínum í mat.

Matarboð eiga að vera rausnarleg en rausninni má samt ofgera.

Við Íslendingar erum snillingar í að ofgera. Þar erum við sennilega sterkastir þjóða.

Of rausnarlegt og flókið matarboð skyggir á gestina. Veitingarnar og tilstandið verða aðalatriði. Gestunum er eiginlega ofaukið.

Drekkhlaðin veisluborð geta sent gestunum þau skilaboð að gestgjafinn hafi í kannski ekki síður áhuga á veitingunum en fólkinu.

Félagsskapurinn verði óbærilegur án veiganna.

Ofvaxið matarboð er eins og hjónavígsla sem ég heyrði um. Þar var mikið tónlistarprógramm, flutt af landsþekktum listamönnum. Fluttar voru drepfyndnar ræður og hástemmd ástarljóð lesin.

Rétt áður en leika átti útgöngumarsinn uppgötvaði presturinn svo að hann hafði gleymt að gefa hjónin saman.

Munaði engu að giftingin gleymdist í sjálfri giftingunni.

Erum við stundum svo gestrisin að við gleymum gestunum?

Þessa speki má svo yfirfæra á lífið sjálft.

Hvernig bjóðum við Lífinu í heimsókn til okkar?

Árið 1994 kom út ljóðakverið Andalúsíuljóð. Það geymir þýðingar Daníels Á. Daníelssonar á ljóðum arabískra riddaraskálda í Andalúsíu á Spáni frá 10., 11. og 13. öld. Ég hef mikið dálæti á þessari litlu bók og lít oft í hana.

Þar er þetta snilldarljóð eftir ´Abd al- ´Aziz ibn al-Quabturnuh sem dó einhvern tíma eftir 1126. Það heitir Heimboð.

Morgunn rakur af döggfalli

og vangi jarðarinnar þakinn

grænum nálum.

Vinur þinn býður þér

að njóta tveggja kraumandi potta

sem nú þegar gefa frá sér

sterka lykt,

nokkurn ilm,

fallega flösku víns,

yndislegan stað,

og ég gæti boðið meira

ef ég vildi.

En það er ekki tilhlýðilegt

að skemmta vinum

með of mikilli viðhöfn.

Flokkur: Bloggar | Breytt s.d. kl. 22:02 | Facebook

Athugasemdir

Sæll Svavar minn. Alltaf gott að lesa eftir þig. En mér finnst þessi mynd svolítið tvíræn, er ekki alveg viss um hvort þetta sé steikarpanna eða bekken? Hvort er það? Hehehehehe. Gat ekki staðist þetta.

Er kominn með stöðu við Tónlistarháskólann Utrecht. Er óskaplega ánægður. Var valinn af mjög mörgum umsækjendum. Hlakka til að sjá þig í maí. Bið að heilsa þeim sem kveðju minni vilja taka. Með beztu kveðju.