Jónsmessusólin

Undanfarið hefur diskurinn Home með The Corrs verið í spilaranum á Volvó mínum og ég er með lagið Buachaill ón Éirne gjörsamlega á heilanum.

Gelíska er annarleg tunga sem ég skil ekki baun í en mér finnst hún fallegt söngmál.

Smám saman hefur orðið til örlítið kvæði við þetta lag. Það er svona:

 

Jónsmessusólin í hæðunum hörund mitt þvær

og hamingjusprotanum brosandi á lífríkið slær,

úr ljósárafjarlægð hún hittir í mosanum maur.

Þú, maríuerla, ert drottning á girðingarstaur.

 

Sýp ég á víni hins áfenga angandi lyngs,

með augunum drekk ég af staupi míns sjóndeildarhrings.

Á netinu könguló spinnur sitt blíðviðrisblogg

en bragsmiðsins vorboðinn ljúfi er ybbandi gogg.

 

Hægt er að hlusta á lagið hér fyrir neðan.

 

.

 

Athugasemdir

[alva (IP-tala skráð) 25.6.2008 kl. 23:55]

Flott ljóð hjá þér!!

[Sveinn Arnar Sæmundsson, 26.6.2008 kl. 15:04]

Sæll!

Hef einmitt verið að hlusta mikið á gelíska tónlist og hún hrífur mig töluvert. Þetta er náttúrulega frábært lag og vel við hæfi að skella þessu góða kvæði við. Kveðja úr blíðunni hér syðra..

[Húnbogi Valsson (IP-tala skráð) 26.6.2008 kl. 18:53]

Fallegt lag og ljóðið alveg frábært. Mér tókst að syngja það með í fyrstu tilraun.

[Freyja, 26.6.2008 kl. 21:08]

Mjög fallegt lag og gelískan hljómar vel þótt ég skilji ekki baun. Söng með og textinn þinn fellur að laginu eins og flís í rass! Það rofaði til í mínum ofnæmishaus og það gleður! Takk!

[Aida., 27.6.2008 kl. 10:00]