Um sel

Þessa sögu sagði mér óljúgfróður ættingi á ættarmóti.

Fyrir allnokkrum árum bar það til tíðinda að selur úr Norðurhöfum álpaðist suður á hinar eilífu leirur Hollandsstranda.

Varð uppi fótur og fit þar syðra. Fréttirnar af hinum hafflótta sel komust á forsíður blaða og í aðalfréttatíma ljósvakamiðla.

Lífsbarátta selsins nísti hjarta Hollendinga og var hrundið af stað söfnun til að forða honum frá dauða. Til þess voru engin ráð önnur en að fljúga með hann til heimkynna sinna í sérútbúinni flugvél í umsjá sérfræðinga .

Kostaði það fúlgur fjár en vel safnaðist enda málstaðurinn góður.

Selnum var flogið hingað norður til Akureyrar. Hér þótti vænlegt að sleppa sel því flugbrautin nær á haf út eins og kunnugir þekkja.

Ferðin gekk vel og selurinn varð frelsinu feginn þegar hann tók fyrstu sundtökin út á Pollinn.

Þá þóttu selir mesta skaðræði á Íslandi.

Selurinn var því skotinn eftir fimm mínútna sundsprett, út af Höfnersbryggjunni.

Hróðugur veiðimaður fékk greiddar 3000 krónur fyrir afrekið gegn því að framvísa neðri kjálka dýrsins.

Afgangurinn af selnum var svo hakkaður í refafóður.

Refir ku vera skynsemdarskepnur en tæplega hafa þeir gert sér grein fyrir því hversu mikið var búið að hafa fyrir máltíðinni kvöldið sem þeir gæddu sér á Hollandsfaranum.

Ef til vill hefur það orðið hollenskum dýravinum einhver huggun að skömmu síðar fór refabúið á hvínandi hausinn eins og lög gerðu ráð fyrir.

(Myndin er af freefoto.com)

Athugasemdir

[Palli (IP-tala skráð) 15.7.2008 kl. 11:19]

Sæll Svavar

 Þú værir nú vís með að segja okkur í næsta pistli hversu stór vél var í selnum, fyrst hægt var að fljúga honum hingað norður.

Ég hélt að rétt væri að segja :

Flogið var með selinn, en EKKI : selnum var flogið.

 P

[Svavar Alfreð Jónsson, 15.7.2008 kl. 11:32]

Þakka ábendinguna, Palli. Auðvitað er betra að segja "ekið var með fólkið" en "fólkinu var ekið". 

Þetta var reyndar enginn venjulegur selur.

[Anna Guðný , 15.7.2008 kl. 11:40]

Veistu hvort hollendingar fréttu eitthvað að afdrifum selsins?

[Svavar Alfreð Jónsson, 15.7.2008 kl. 14:38]

Nei, Anna Guðný, hef ekki hugmynd um það - enda ekki víst að sagan hafi verið nákvæmlega eins og ég heyrði hana, hvað þá eins og ég sagði hana. En hún er samt ágæt.

[Anna Guðný , 15.7.2008 kl. 22:45]

Sagan var góð , já.

[Víðir Benediktsson, 15.7.2008 kl. 22:50]

þessi saga er mjög nærri lagi, ég man vel eftir þessum atburði. Þetta var minnir mig snemma á níunda áratugnum.

[Óskar Arnórsson, 16.7.2008 kl. 14:48]

Það er svo mikið til af sel að það mætti veiða hann og bræða í lýsi. Lýsið mætti svo nota á báta og skipavéla. samma mætti gera við hval..

Það yrði hægt að minnka diesel-olíukaup í stórum stíl út á þessar veiðar..seler eru og verða alltaf skaðræðisskepnur ef þeir eru ekki veiddir. Enn nytjafiskur ef þeir eru veiddir..einfalt mál þetta.. 

[Steinunn Helga Sigurðardóttir, 19.7.2008 kl. 05:57]

já ekki verð ég undrandi á þessu, og ætla ekki að hafa fleiri orð um það þó svo að ég hugsi þau !

Kærleikur til þín

steina

[Sigurður Þór Guðjónsson, 21.7.2008 kl. 11:19]

Afhverju eru selir og öll dýr skaðræðisgripir? Bara af því að þeir þurfa að éta eins og maðurinn. Mikið er þetta ógeðfelld afstaða til náttúrunnar að hún sé EINGÖNGU metin út frá nýtjum mannanna. 

[Óskar Arnórsson, 24.7.2008 kl. 05:41]

Selur eru eru þeir fiskar sem breiða út "sullaveiki" í þorski. Þess vegna þarf að tína ormana í honum. Þetta er ekkert ógeðfelld afstaða til náttúrunnar. Hver vill hafa minka í hænsnabúum? Minkavinafélagið? Hver vill hætta að slátra lömbum á haustinn? Lambavinafélagið? Hver er vill að að hvalir veiði tvöfalt meira enn allur fiskiskipafloti Íslands? Hvalveiðifélagið? 

Þessi "krútt-mentailítet" um fiskana í sjónum, minnir mig á grein í morgunblaðinu fyrir ca. 30 árum. Sýnd hafði verið heimildamynd gerð um borð í togara. Ein greinin var frá konu sem spurði hneyksluð hvort ekki væri hægt að deyfa fiskana áður enn þeir væru skornir á háls! (blóðgaðir) ég man ekki til að nokkur hafi svarað þessarri grein, enda ekki svara verð. Það er fólk sem er orðið aftengt náttúrunni sem ekki skilur einföldustu hluti um fiskibúskap....  

[Sigurður Þór Guðjónsson, 28.7.2008 kl. 00:25]

Þetta er ekkert krúttmentalitet. Það er ekki hægt að bera saman seli í frjálsum sjó og minka í hænsabúum. Mér finnst þetta nytjasjónarmið, að alla náttúru skuli EINGÖNGU, eins og mér sýnist Óskar gera, metið eftir hag mannanna, ekki mega vera alveg einrátt. Vilt spendýr eru ekki bara skaðræðisdýr ef þeir eru ekki veiddir. Ég held með selnum!

[Óskar Arnórsson, 28.7.2008 kl. 07:50]

Ég er með nytjasjónarmið fiskistofna í huga Sigurður, og þar tel ég sel vera til skaða..það væri nær að veiða sel enn að setja upp álverksmiðjur að mínu mati..ég held líka með selnum..sem matfiski..