Ein með öllu með Möggu

Hátíðin Ein með öllu og allt undir hefur staðið yfir hér á Akureyri frá því á föstudaginn.

Samkvæmt fréttum frá lögreglunni er töluverður fjöldi fólks í bænum og allt hefur gengið stóráfallalaust fyrir sig.

Mér finnst yfirbragð hátíðarinnar nú allt annað en á undanförnum árum.

Í fyrsta skipti finn ég að bæjarbúar sjálfir eru spenntir fyrir þessari hátíð. Verði haldið áfram á sömu braut er ég viss um að þeir líta á hana sem sína eigin.

Á liðnum árum hefur hátíðin verið umkomulaus. Hún kemur Akureyringum ekki við. Þeir hafa talað um að "forða sér úr bænum" meðan hún stendur yfir.

Það er boðið í partí en gestgjafar fyrirfinnast engir. Þeir eru á flótta undan gestunum.

Forsvarsmenn hátíðarinnar að þessu sinni gera sér á hinn bóginn grein fyrir að ekki er hægt að auðsýna gestrisni án gestgjafa.

Magga Blöndal vissi alveg hvað hún var að gera þegar hún ákvað að gefa tóninn strax með fyrsta dagskráratriðinu, óskalagatónleikum Eyþórs Inga Jónssonar, organista í Akureyrarkirkju.

Hellingur af fólki var í kirkjunni og mikill fjöldi í blíðunni fyrir framan hana og í kirkjustöllunum þar sem hægt var að hlusta á tónleikana í hátölurum.

Þar mátti sjá fólk á öllum aldri, bæði innfædda og aðkomna.

Snillingurinn hógværi Eyþór Ingi fór á kostum og það var bæði notalegt og afslappandi að sitja í kirkjunni.

Eftir tónleikana gengum við niður í bæ, settumst fyrir utan Bláu könnuna, fengum okkur örlitla hressingu og fylgdumst með mannlífinu í göngugötunni.

Í hádeginu í gær lá leiðin í Lystigarðinn þar sem Hemmi Ara söng og lék fyrir fólk ásamt félögum sínum. Þar var sama ljúfa stemmningin, fólk sat á flötinni, hlustaði á tónlistina og tók jafnvel undir með munnana fulla af flatbrauði með hangikjöti.

Núna á eftir ætla ég að fara á hádegistónleika i Iðnaðarsafninu, þar sem meðal annars koma fram þær stöllur Guðrún Gunnarsdóttir og Inga Eydal. Boðið verður upp á akureyskar kræsingar, pylsur með rauðkáli og eðaldrykkinn Vallash.

Ég vona að þessi útihátíð eigi eftir að ganga vel og ef eitthvað kemur upp á er ég sannfærður um að menn læri af mistökunum.

Margrét Blöndal og hennar fólk fær stórt bros frá mér.

Og Amen dagsins.

Athugasemdir

[Þorsteinn Gunnarsson, 3.8.2008 kl. 17:20]

Sæll félagi... Gott að heyra að vel gengur í Heiðardalnum þessa helgina og það má þá kannski segja um þetta að þið hafið haldið "Eina með öllu.... og Möggu ofaná"

 Kv. Steini

[Benedikt Sigurðarson, 5.8.2008 kl. 14:33]

Gott að heyra af því sem gengur framar vonum - og miklu betri bragur á öllu en síðustu mörg árin.

Við vorum "oná" að þessu sinni en ekki "með allt undir" . . . þrátt fyrir titilinn.

Annað mál; tókuð þið eftir veðurfréttum og spám í aðdraganda og fram á helgina?  Eg held að það hafi verið samsæri í gangi; - t.d. var gefið upp á vedur.is að bæði á fimmtudag og föstudag að veðurathugun sýndi miklu lægri hita en raunin var. t.d. frá því kl 9 til að verða 12 ´á föstudag var sagt að það væri 12 stiga hiti og þoka á Akureyri kl 9:00 þann morgun.  Reyndin var á bilinu 18-20 gráðu hiti og alveg léttskýjað þennan morgun . . . . .

Og á laugardaginn var í Fnjóskadal í steikjandi 20-24 gráðum - og þá hringdi kunningi að sunnan í eftirmiðdaginn og spurði mig hvort ég væri ekki að drepast úr kulda þarna á hestinum?   - - þá var sem sagt´bæði RÚV og vedur.is að sýna skítaveður á  þessum landshluta.

Held að þarna  sé eitthvað sem þarf að bregðast við . . .

[Svavar Alfreð Jónsson, 5.8.2008 kl. 15:06]

Bensi, hér er yfirleitt alltaf sól og blíða og bæði stórundarlegt og pirrandi hvað það sést sjaldan á veðurkortunum. Auðvitað er þetta ekkert annað en argasta samsæri og öfund. Eina ráðið er held ég að heimta Veðurstofuna hingað norður og setja þá veðurfræðinga í bann sem ekki geta spáð almennilega.