Svavar Alfreð Jónsson

12.10.2008 | 20:23

Kennsla í nútímaviðskiptum

Þekking mín á hagfræði er ekki merkilegri en svo að lengi hélt ég að gjöld þeirra sem létu vigta bíla sína á hafnarvoginni rynnu í vogunarsjóð.

Í dag heyrði ég sögu sem jók skilning minn á viðskiptum nútímans.

Hún er höfð eftir landskunnum athafnamanni sem heyrði hana hjá pabba sínum.

Á gönguferðum mætti pabbinn oft nágranna sem var að viðra hundinn sinn.

Dag nokkurn gekk hann fram á eiganda hundsins án hunds og spurði hverju hundleysið sætti.

Maðurinn kvaðst vera búinn að selja hundinn. Hefði fengið eina milljón króna fyrir dýrið.

Pabbinn varð hissa á þessu háa verði. Spurði manninn hvort hundurinn hefði verið af einhverju frægu kyni.

Hundahöndlarinn sagði svo ekki vera. Uppruni rakkans væri mjög vafasamur.

En hann hefði fengið greitt fyrir hundinn með tveimur köttum og mæti hvorn þeirra á um það bil hálfa milljón.

Flokkur: Bloggar | Breytt s.d. kl. 20:25 | Facebook

Athugasemdir

... ég er einmitt að hugsa um að mála mynd og hengja upp heima hjá mér... tek það fram að ég er ekki listmálari... svo ætla ég að verðleggja hana á 5 milljarða... ... þá er ég loksins orðinn moldríkur...

Brattur, 12.10.2008 kl. 22:24

Takk fyrir afbragðsgóðan pistil. Ég held að fólk sé einmitt að byrja að ná þessu núna! Höfum verið alltof lengi blinduð af því að hugsa aðeins um eigin rass á meðan aðrir gangast upp í svívirðu.

Sjálfur bý ég sem betur fer yfir þónokkru hugviti og útsjónarsemi, en ég er ekki á leiðinni að fara að veðsetja það! Væri hinsvegar alveg til í að láta "viðskiptavildina" fara upp í skuld núna, það er nefninlega fullt af fólk þarna úti sem skuldar mér greiða. Þið vitið hver þið eruð...