Samherjar

Í tilefni af aldarfjórðungs afmæli fyrirtækis síns buðu þeir Samherjafrændur til mikillar veislu í dag. Þar var að sjálfsögðu boðið upp á sjávarfang í ýmsum neyslumyndum.

Íslensk matvæli eru meðal þess sem gefur þjóðinni fyrirheit um góða framtíð. Við eigum alveg einstakt hráefni í sjónum kringum landið. Við eigum duglega sjómenn, atorkusama útgerðarmenn, metnaðarfullt fiskvinnslufólk og kokka sem kunna til verka.

Það var gaman að fá að smakka á þessari framtíð landsins á afmælisdegi Samherja.

Ekki síður gladdist maður yfir höfðingsskap þeirra frænda í garð samfélagsins hér á Akureyri. Þeir veittu alls 50 milljónum króna í styrki til margs konar verkefna, einkum í þágu barna og unglinga.

Styrkirnir koma sér vel fyrir akureysk ungmenni og þeir eru líka viðurkenning og hvatning til þeirra sem vinna að málefnum þeirra.

Æskulýðs- og barnastarf kirknanna á Akureyri fékk rausnarlegt framlag frá Samherja. Takk fyrir það. Við munum gera okkar besta til að verða yngstu kynslóðinni til blessunar.

Þegar við tölum um íslenska framtíð er það auðvitað fyrst og fremst æskan sem hana myndar.

Við leggjumst öll á eitt við að varðveita og þroska þann frábæra efnivið framtíðar sem til staðar er í æsku landsins.

Þar eigum við öll að vera samherjar.

Athugasemdir

[Soffía (IP-tala skráð) 7.12.2008 kl. 22:38]

Samherji bara kominn á fullt í ímyndarvinnuna, eftir að þjóðin áttaði sig loksins á því hvernig þeim og öðrum stórum útgerðarfélögum tókst að veðsetja aflaheimildirnar og rústaði þar með fjölda sjávarþorpa og lífshamingju og eigum fólks um allt land.

Vona að þeir komist ekki lengra, skuldsettir eins og þeir eru langt upp fyrir mastur.

[Bögga (IP-tala skráð) 8.12.2008 kl. 10:56]

GUÐ HJÁLPI SUMU FÓLKI HVERNIG ÞAÐ HUGSAR.ÁFRAM FRÆNDUR.

[Fannar frá Rifi, 8.12.2008 kl. 11:35]

Soffía. afhverju ertu að einbeita þér bara að sjávarútvegi? hvernig er skuldsettning og veðsettning allra fyrirtækja, einstaklinga og heimilalandsins?

Þetta er flott framtak. Vonandi geta þeir frændur farið að vinna aftur í því að reisa nýju vinnsluna sem þeir frestuðu í fyrra vor. 

[Magnús Guðjónsson, 8.12.2008 kl. 14:47]

Frábært framtak að taka samfélagslega ábyrgð með þessum hætti.  Uglingastarf í íþróttafélögum er einhver besta forvörn sem til er og að leggja því lið með jafn veglegum hætti og hér er gert ætti að verða öðrum til eftirbreytni..