Loðnar konur

Fyrir nokkrum árum spjallaði heimspekingur við fermingarbörnin í Akureyrarkirkju. Dómgreind var eitt umfjöllunarefnanna. M. a. var rætt um gylliboð auglýsinganna enda var þessi fundur í desember þegar auglýsingaflóðið nær hámarki.

Heimspekingurinn bað börnin að nefna dæmi um gylliboð. Ein stelpan sagði að mamma sín hefði einu sinni látið glepjast af auglýsingu um háreyðingarkrem. Kremið hefði að vísu eytt hárum en ekki látið þar við sitja.

Húðin hefði líka flagnað af mömmu.

Börnin könnuðust mörg við þessa auglýsingu og gagnrýndu hana mjög.

Eitt fermingarbarnanna klykkti svo út með því að segja að þar að auki sendi auglýsingin okkur þau skilaboð að það væri eitthvað að því að vera pínulítið loðinn.

Nú veit ég að margar konur vilja síður vera loðnar um leggi og hvað þá kjamma en þrátt fyrir það kom fermingarbarnið auga á það sem við sjáum gjarnan ekki: Auglýsingar eru meira en auglýsingar. Þær selja ekki bara vörur eða þjónustu.

Auglýsingar búa til ímyndir og fyrirmyndir. Þær sýna okkur fólk sem við viljum líkjast. Og þær sýna okkur lúserana sem við viljum ekki líkjast.

Auglýsingar birta okkur lífið sem er eftirsóknarvert og þær benda líka á það sem við eigum að forðast. Þær skilgreina sóknina og flóttann.

Þær segja okkur hvað við eigum að þrá og óttast. Þær skapa draumana og martraðirnar með öllum sínum skegglausu og kafloðnu konum.

Auglýsingar innræta gildi og siðferði. Þær móta viðhorf. Þær búa bæði til goðin og átrúnaðinn.

Daginn út og inn eru auglýsingarnar að ala okkur upp.

Hvað haldið þið t. d. að íslenskt barn sjá og heyri margar auglýsingar á degi hverjum?

Auglýsingar hafa átt sinn þátt í því að brengla gildismat okkar.

Margar auglýsingar eru hættulegar.

Best er að verjast þeirri hættu með góðri dómgreind og heilbrigðu gildismati.

Væri ekki fróðlegt að rannsaka auglýsingar liðinna ára og skoða það sem þær hafa verið að innræta okkur?

Athugasemdir

[DoctorE (IP-tala skráð) 19.1.2009 kl. 13:52]

Sko... ríkiskirkjan ræðst BEINT að saklausum börnum í skólum og auglýsir sjálfa sig.
Þetta verður að teljast mjög svo gróft og skammarlegt, ekki hægt að afsaka slíka hegðun!

[Aida., 19.1.2009 kl. 19:17]

Alveg sammála Svavar og mj´ög góður púnktur.

Ekki auðvelt að vera kona, tala nú ekki um loðin kona.

Samt skapaði Guð okkur svona.

[Árni Sveinn (IP-tala skráð) 19.1.2009 kl. 22:00]

Ég var einmitt að velta því fyrir mér hér um árið, hvernig á því stæði að kvikmyndaeftirlit ríkisins leyfði sýningar á "bönnuðu efni" ss. sundurtættum líkum og fleira í þeim dúr, í kvöldfréttum sjónvarpsins. Jújú, það koma svosem viðvaranir á undan því allra grófasta.  En það er nóg að hafa þetta klingjandi í eyrunum á hverjum degi, þú þarft ekkert endilega að horfa til þess að þetta skili sér í vitundina.

Við ölum börnin okkar við að borða matinn sinn og kyngja honum niður með fréttum af morðum, nauðgunum og fleiru miður skemmtilegu.  Þetta hefur skilað sér út í þjóðfélagið, við sjáum það á hverjum degi.  Fólk kann ekki orðið að bera virðingu hvert fyrir öðru lengur.  

Hvernig ætli standi á þessu?

[Gullvagninn (IP-tala skráð) 20.1.2009 kl. 07:37]

Árni Sveinn - fréttatímar eru hannaðir með þessu móti, blóði, alvöru og skemmtun öllu blandað saman.  Tilgangurinn er að gera okkur sinnulaus, það er svo absúrd, nýbúin að fjalla um t.d. slátrun á börnum og borgurum á Gaza, svo er bara svissað yfir á léttu nóturnar og sýndur syngjandi hundur eða álíka.

[Árni Sveinn (IP-tala skráð) 20.1.2009 kl. 08:28]

Sæll Gullvagn.

Já ég geri mér grein fyrir því að þeir séu hannaðir svona.   Mér finnst hins vegar merkilegt að stofnun sem á að hafa eftirlit með óæskilegu efni skuli ekki gera athugasemdir við fréttatíma sjónvarpsstöðvanna.  Þetta er sent út kl 18:30 og 19, tími þegar flestöll börn eru enn vakandi á.  

Ég þekki til á mörgum heimilum þar sem þetta fær að bulla yfir hausamótunum á yngstu fjölskyldumeðlimunum dag eftir dag.  Sjálfur hætti ég að horfa á sjónvarp fyrir nokkrum árum.  Verð að segja að mér finnst það mun betra, mér finnst betra að ala upp barnið mitt svona og auglýsingarnar eru þá ekki að dynja á barninu jafn grimmt.  

En það er kannski bara málið, við höfum öll val um að slökkva.