Davíðsblogg númer tvö

Í kvöld heyrði ég formann Samfylkingarinnar kvarta sáran undan því að ennþá stjórnaði Davíð Oddsson umræðunni á Íslandi.

Hvað veldur því?

Sumir dá Davíð en ég efast um að áhrif hans stafi af því.

Davíð virðist ekki síður stjórna umræðunni meðal þeirra sem hafa horn í síðu hans en hinna sem dá hann.

Sjálfstæðisflokkurinn er margslungið fyrirbæri. Þar eru samankomnir kaldhamraðir frjálshyggjunaggar, fólk af rótgrónum útgerðarmanna- og heildsalaættum, velmeinandi hægrikratar, hreinræktaðir kapítalistar, kristilegir demókratar og gamaldags íhaldsfauskar og konungssinnar - svo nokkuð sé nefnt.

Þessari hjörð hélt Davíð saman.

Hann er ekki lengur það sem sameinar Sjálfstæðismenn.

Hann hefur á hinn bóginn sennilega aldrei hætt að vera það sem sameinar andstæðinga Sjálfstæðismanna.

Þó að Sjálfstæðisflokkurinn sé fjölskrúðugur hópur eru þeir sem ekki eru Sjálfstæðismenn enn fjölbreytilegri.

Það er held ég nokkuð viðurkennd hópsálarfræði að hópurinn þurfi annað hvort að eiga sér sameiginlega vini eða óvini.

Óljóst er hvaða vin ekki-sjálfstæðismenn geta sameinast um en Davíð hefur verið þeirra óumdeildi sameiginlegi óvinur.

Þeir sem ekki exa við déið gátu fylkt sér bak við andstæðinginn Davíð.

Ég hef svo sem ekki hugmynd um hvort Davíð sé horfinn af leiksviðinu en ef svo er held ég að það muni mest bitna á þeim sem hafa sameinast um að vera á móti honum.

Nú er sameiningartákn þeirra horfið.

Annað hvort mun hópurinn riðlast eða hann verður að finna sér annað til að sameinast um.

Athugasemdir

[TARA, 26.2.2009 kl. 23:51]

Það er mikið til í þessum pistli þínum...

[Katrín Linda Óskarsdóttir, 27.2.2009 kl. 00:03]

Það er sem ég segi ...  Davíð er snillingur   Ef hann hættir afskiptum af stjórnmálum þá er næsta víst að Bjarni Benediktsson verður "arftaki" hans. Það verður ekki auðvelt hlutverk samt!

[Heimir Lárusson Fjeldsted, 27.2.2009 kl. 10:47]

Ingibjörg Sólrún átti aðeins einn andstæðing. Hvað nú? Hættir hún þegar ætlunarverkinu er lokið?

[Adda Þorbjörg Sigurjónsdóttir, 27.2.2009 kl. 12:14]

Ég vil Davíð sko endilega áfram í pólítík þó ekki nema vegna þeirra gríðarlegu áhrifa sem hann virðist hafa á andstæðingana. Reyndar er ég þó sammála þér að hann virðist virka þannig að sameini vinstri menn gegn því sem þeir álíta hinn illa sjálfan og fljótt á litið það eina sem þeir virðast geta komið sér saman um er að kenna sjálfstæðisflokknum og holdgervingi hans Davíð um allt. Stórfurðulegt fyrirbæri þessir vinstri menn.

[Adda Þorbjörg Sigurjónsdóttir, 27.2.2009 kl. 12:15]

Heimir ég verð ekki hissa ef Samfylkingin liðist fljótlega i sundur ef ISG hættir því þar er sundurleitur hópur.

[Hallgerður Pétursdóttir (IP-tala skráð) 27.2.2009 kl. 17:27]

Skemmtileg hugleiðing og dýpri við lestur númer tvö  Góður !

[Páll A. Þorgeirsson (IP-tala skráð) 27.2.2009 kl. 19:41]

Það sem vakti mesta undrun mína, hugsanlega í þessu sama viðtali, var þegar ISG svaraði því til að Seðlabankinn hefði haft "tækin" til að takast á við "hagkerfið" og þeir hefðu átt að framkvæma.  Datt henni aldrei í hug að gera athugasemdir við Seðlabanka um aðgerðir ef þessi "tæki" voru lítið notuð.  Þessi blessuð kona var ráðherra og hún hlýtur að hafa gert sér grein fyrir því sem var í gangi í þjóðfélaginu, ef ekki þá hefur hún verið mun veikari en margir héldu.  Hún neitaði ekki fyrirspurn varðandi ábendingar og skýrslur um stöðu þjóðfélagsins en sennilega lítið gert með það og sofið á verðinum eins og svo margir aðrir.  Þrátt fyrir að ég hafi ekki heyrt hana viðurkenna mistök sín frekar en flestir aðrir hafa gert veit blessuð konan að hún gerði sín "stóru pólitísku" mistök strax í sinni fyrstu og væntanlega síðustu sjóferð sem ráðherra.  

ISG er búin að hafa DO á heilanum svo lengi sem ég man og sennilega DO hana, svo hvernig getur svona fólk unnið saman ?  Ég vona að hún losni við DO-hugsunina sem fyrst og "án gríns" þá hefur það hugsanlega lagast við heilaaðgerðina sem hún fór í, tekur bara nokkra mánuði að jafna sig.  Ég óska henni góðs bata og vona að hún sjá sjálf að hennar tíma er lokið í pólitík.  Ég verð mjög undrandi ef ISG kemur til baka í stjórnmálin.  Ég tel að hennar tíma sé lokið í pólitík og hún sleppur með að viðurkenna sín "pólitísku mistök" í bráð.