Hrokinn ekki síður en græðgin

Græðgi banka og viðskiptafólks er ekki eina skýringin á kreppunni. Orsök hennar er líka sú að síðustu áratugina hafa stjórnvöld unnið að afnámi boða og banna í fjármálageiranum, bæði í Bandaríkjunum og Bretlandi.

Þetta segir erkibiskupinn af Kantaraborg, dr. Rowan Williams, í ræðu sem hann flutti fyrr í þessum mánuði.

Biskupinn sagði að í kapítalismanum væri siðferðilegur kjarni að því leyti að þar væri reynt að takmarka áhættu og dreifa auði. Kapítalismi nútímans hefði samt glatað þeim siðferðilegu markmiðum.

Þess í stað hefði sú trú verið boðuð að peningamarkaðurinn væri án áhættu. Hrokinn hefði leitt til hrunsins ekki síður en græðgin.

Dr. Williams lét ekki nægja að greina ástandið og leita skýringa á því. Hann gaf líka góð ráð í ræðunni. Í endursögn Timesonline af henni segir:

He called for a restoration of trust and a realistic understanding of risk, an acknowledgement of environmental cost in economics, more thinking about the role of government in the regulation of currency exchange and capital flow including international conventions about wages and working conditions, a re-examination of bodies such as the IMF and the World Bank and a balanced response to the crisis.

Erkibiskups boðskap óstyttan má lesa hér.

Athugasemdir

[Geir Ágústsson, 18.3.2009 kl. 20:57]

Kirkjunnar menn lesa því miður lítið af hagfræðitextum, og það má rökstyðja með til dæmis fjarveru hagfræðilegs skilnings í orðum nefnds biskups.

Sennilegri tilgáta er að seðlaprentun ríkisins, ríkisábyrgðir á húsnæðislánum og ríkistryggingar á innistæðum séu rótin að þeim vanda sem menn glíma nú við um allan heim.

Þess að sjá það er því miður ekki nóg að mæta til sunnudagsmessunnar. Stundum þarf að grafa dýpra (en þó ekki dýpra en rúmlega 100 blaðsíður af texta).

Boðskapurinn er miklu frekar: Ef þú prentar fullt af pening og stingur honum í vasa hins venjulega manns, mun hann þá ekki byrja að eyða áður en aðrir uppgötva hvað hið nýja prentupplag peninga mun verða lítils virði þegar aðrir átta sig á því að hann bjó til peningana úr þurru lofti og án verðmætasköpunar?

Góðar stundir.

[Sigurður Þór Guðjónsson, 20.3.2009 kl. 22:49]

Heyra má ég erkibiskups boðskap ... eða þannig!