Ríkasta land í heimi

Fyrir um það bil ári þótti ekkert hallærislegt að velta fyrir sér hvernig fara ætti að því að gera Ísland að ríkasta landi í heimi.

Skrifaðar voru bækur um málefnið og búnar til kvikmyndir sem dembt var yfir landslýð.

Hinir þóttu yfirmáta hallærislegir sem ekki voru tilbúnir að stíga dansinn.

Stundum deila menn um það hvort Ísland sé kristið. Sitt sýnist hverjum en eitt er að mínu mati alveg á hreinu:

Þjóð sem hefur það að markmiði að verða ríkust allra stendur ekki á kristnum grunni.

Það er ókristilegt að hafa peninga sem markmið. Peningar geta verið leið að markmiði en þeir eru aldrei markmið.

Þeir eru tæki en ekki tilgangur í sér sjálfum.

Þetta á við um þjóðir, einstaklinga, stofnanir og fyrirtæki.

Jesús Kristur minnti okkur á að hvíldardagurinn væri mannsins vegna en ekki öfugt.

Á sama hátt eru peningarnir til að þjóna manninum. Maðurinn er ekki til þjónustu við peningana.

Þjóðfélag sem hefur það að markmiði að eignast sem mest af peningum en lætur liggja milli hluta hvernig þeim auðæfum er varið lætur manninn og heill hans liggja milli hluta. Þjóðfélag sem hefur auðsöfnun að markmiði er mannfjandsamlegt kerfi.

Gegn slíku kerfi ber okkur að berjast með öllum tiltækum ráðum.

Athugasemdir

[Hilmar Gunnlaugsson, 20.4.2009 kl. 15:38]

Alveg sammála þér Svavar en ég er sannfærður um að peningar verði ekki aðalatriðið hjá þjóðinni mikið lengur. Nú er kominn tími til að við snúum bökum saman og vinnum hér að farsælla samfélagi en áður var.

[Hólmfríður Pétursdóttir, 20.4.2009 kl. 16:14]

Mæl þú manna heilastur.

[Brattur, 20.4.2009 kl. 20:49]

Við eigum ríkasta land í heimi... og vonandi verður aldrei frá okkur tekið...