Nýkosinn og fínn

Eftir grjónagrauts- og brauðsúpuveislu hjá mömmu dreif ég mig í Verkmenntaskólann að kjósa.

Þar beið fólk í löngum röðum eftir að komast bak við tjöld kjörklefanna. Biðin var mörgum kærkomin sem sögðust nota hana til að hugsa sig um. Aðrir margskiptu um skoðanir meðan þeir biðu og settu exin sín á óvænta staði þegar þeir loksins komust að kjörkötlunum. Enn öðrum leiddist biðin og kusu einhverja vitleysu í geðvonskukasti.

Mamma bakaði tvær kökur handa íhaldinu. Þær voru vægast sagt girnilegar. Samt ætla ég ekki í neitt kosningakaffi og allra síst má ég vera þar sem búast má við erfiðum sálgæsluverkefnum (af heilsufarsástæðum).

Ekki auðveldaði það stöðuna í biðröðinni að mikill vindgangur upphófst í mér eftir brauðsúpuna og rjómann. Ég var því pínulítið samanherptur þegar ég gekk fyrir starfsmenn kjörstjórnar.

En svo er maður allur léttari svona nýkosinn.

Nú bíð ég þess sem koma skal og les bókina Inside North Korea eftir Mark Edward Harris. Það er hin fróðlegasta lesning og myndirnar hreint fyrirtak.

 

 

Athugasemdir

[Páll A. Þorgeirsson (IP-tala skráð) 25.4.2009 kl. 16:11]

Gott að heyra að þú ert á góðri leið í batanum og ekki láta þér detta í hug að þú losnir við verkefnið sem við ræddum 20.09.1996.  Ég get víst ekki gefið þér upp ár, mánuð eða dag, það er ákveðið á "æðri" stöðum. 

Þungu fargi af þér létt og kosningakassinn örlítið þyngri.  Mikið átt þú gott.   Ég er búinn að útiloka alla flokka nema einn.  Nú sit ég og reyni að sannfæra mig um að hann sé það eina rétta eða að það eina rétta sé að skila auðu.  Ég hef sjaldan átt í vandræðum með valið og aldrei átt í svona svakalegum vandræðum með "eina rétta valið".