Ferðafuður á uppstigningardegi

Uppstigningardag nýtum við hjónin til ferðalaga. Einkasonurinn er að fara að heiman og flytur til Dresden í Þýskalandi. Þar ætlar hann í háskóla.

Foreldrarnir fylgja honum landið á enda, alla leið til Keflavíkur, þaðan sem hann mun stíga upp með loftfari Air Berlin um miðnætti.

Ekki er flækingi okkar þar með lokið. Ólafsfirðingar hefðu kallað okkur hinar mestu ferðafuður.

Kór Akureyrarkirkju er á söngferðalagi um Dali og Snæfellsnes. Eftir að hafa kvatt stráksa eigum við randevú við heilan kirkjukór vestur í Ólafsvík en kórfélagar voru svo vinsamlegir að bjóða okkur með í túrinn.

Helginni eyðum við í að skoða náttúruperluna Snæfellsnes og njótum gestrisni íbúanna.

Svo fáum við að hlusta á besta kirkjukór í heimi og verðum í félagsskap við skemmtilegasta kirkjukór í heimi.

Myndina tók ég af uppstígandi einkasyninum og systrum hans úti í garði í gær. Honum var haldið samsæti í tilefni dagsins með grilluðu lambalæri og tilheyrandi. Ég slátra alikálfi þegar hann kemur heim.

Athugasemdir

[Sigurður Þór Guðjónsson, 21.5.2009 kl. 18:22]

Í Dresden eyddi Heinrich Schutz, mesta trúartónskáld allra alda, mestallri ævi sinni. Krosskirkjan í Dresden er enn að syngja hann reglulega.  Einu sinni kom ég til Dresden.  

[Haukur Kristinsson (IP-tala skráð) 22.5.2009 kl. 08:40]

Ég óska syni þínum alls góðs í Dresden.

Gute Reise und einen erfolgreichen Aufenthalt.

[Magnús Erlingsson (IP-tala skráð) 24.5.2009 kl. 13:55]

Strákurinn er nokkuð líkur pabba sínum í útliti. Og dæturnar skarta fegurð móður sinnar.

Bestu kveðjur frá gömlum skólafélaga, nú búsettum á Ísafirði.

Magnús