Framtíð landsins

Þessa dagana starfar fermingarskóli Akureyrarkirkju á Vestmannsvatni.

Ég var að koma heim eftir dvöl með fyrsta hópnum þar eystra.

Gaman var að sjá hversu vel krökkunum leið úti í náttúrunni. Sum voru ótrúlega seig í berjamó og fljót að fylla skyrdollurnar.

Og nóg var til af þeim eftir hetjulegt skyrát krakkanna.

Það var enginn matvandur í hópnum og ekki fúlsað við neinu hvort sem það var KEA-skyr eða Royal-búðingur.

Fátt er þjóð mikilvægara en að búa vel að æsku sinni.

Hluti af því er að kenna ungmennum það sem við teljum hollt, gott, satt og rétt.

Og innræta þeim virðingu fyrir því sem heilagt er á himni og jörðu.

Af því ræðst framtíð landsins.

Á myndinn erum við í kvöldgöngu í Vatnshlíðinni. Vestmannsvatn, Höskuldsey og hið dásnotra Hólkot í baksýn.

 

 

Athugasemdir

[Egill Helgason (IP-tala skráð) 14.8.2009 kl. 22:59]

Ég dvaldi á Norðurlandi í tíu daga, þarna er mikil matarkista. Við fengum alls kyns frábæran mat úr sjó, vötnum og af landi.

Það eru ótal tækifæri í landinu, ekki síst í matvælaframleiðslu það sem háir okkur mest eru úr sér gengin kerfi, mannanna verk, sem halda aftur af sköpunarkrafti fólksins.

Sonur minn borðaði allt með bestu lyst, líka hrátt hrefnukjöt.

En ég verð að segja að ég yrði stoltur af honum ef hann fúlsaði við Royal búðingi.

Já, og meðan ég man, það er fallegt og hátíðlegt að ganga upp tröppurnar og inn í Akureyrarkirkju að kvöldlag.

[Svavar Alfreð Jónsson, 15.8.2009 kl. 15:42]

Þakka þér fyrir þetta, Egill. Þú ert alltaf velkominn og næst verðum við að skála í Royal-búðingi.