Mælskir moðhausar

Vandræðaminnst er að hlusta á þá sem maður er sammála.

Því getur á hinn bóginn fylgt vesen að heyra menn lýsa sjónarmiðum sem eru ekki manns eigin.

Ekki síst ef það er vel gert og ég fer að efast um það sem ég hélt.

Sumt fólk með undarlegar skoðanir er óþarflega vel máli farið.

Hentugast er að hafa mestu rugludallana nánast ótalandi - sem er reyndar oft raunin.

Málið fer að vandast þegar þeir fara að kunna að koma fyrir sig orði.

Jónas frá Hriflu og Sverrir Kristjánsson sagnfræðingur voru ekki skoðanabræður.

Jónas sagði eitt sinn um Sverri að hann væri ekki nema glerbrot á sorphaugum mannlífsins.

Þó gæti hann stundum talað eins og hann væri full flaska.

Myndin er frá Vestmannsvatni. Þar var ég í morgun með fermingarbörnum. Við sigldum út í Höskuldsey í aftakablíðu.

Athugasemdir

[Bergur Thorberg, 19.8.2009 kl. 08:12]

Góðan daginn Svavar. Orðið "aftakablíða" hjó í athygli mína. Hvað þýðir það orð? Er fyrri hluti orðsins skyldur orðinu "aftaka", í merkingunni "líflát"? Mér finnst þetta ljótt orð. Það hljóta að vera til önnur orð á íslensku sem lýsa þessu veðurfari sem þið lentuð í? Varla ertu að lýsa veðurfarinu þannig að það hafi verið stafalogn, sem hentaði vel, ef taka ætti mann af lífi? Það held ég varla en orðið er misvísandi og fer illa í munni Guðsmannsins. Lifðu heill.

[Svavar Alfreð Jónsson, 19.8.2009 kl. 08:40]

Samkvæmt minni ágætu orðabók er aftak orð sem notað er til áherslu. Til dæmis er aftakamaður sá sem er einarður. Sumt getur verið aftaka-stórt. Aftakablíða er mikil blíða. Þakka athugasemdina.

[Bergur Thorberg, 19.8.2009 kl. 09:12]

Ég kannast við "að taka af skarið" en er aftakamaður ekki bara böðull?? kveðja.

[Svavar Alfreð Jónsson, 19.8.2009 kl. 09:31]

Ég aftek með öllu að aftakamaður sé böðull. Aftökutæknir væri í áttina.