Við fáum tapið af gróðanum

Í gær fjallaði leiðari Fréttablaðsins m. a. um hina misheppnuðu frjálshyggjutilraun íslenskra stjórnvalda og nauðsyn þess að þjóðin axlaði ábyrgð á henni - eins og til var vitnað í næstu bloggfærslu hér á undan.

Himinhá laun og fáránlegir bónusar var eitt af því sem einkenndi frjálshyggjutilraunina miklu sem íslenskum almenningi er ætlað að bera ábyrgð á og borga fyrir samkvæmt leiðara Fréttablaðsins í gær.

Leiðari Fréttablaðsins í dag ber yfirskriftina "Jákvæðir bónusar".

Ég held að hann sé skrifaður af sama manni og vildi í gær láta íslenskan almenning bera ábyrgð á frjálshyggjutilrauninni.

Í leiðaranum er kerfi hinna himinháu bónusa varið með kjafti og klóm. Ekkert sé að því.

Gripið er til fornfrægra frjálshyggjufrasa og sagt orðrétt:

Þetta er gott kerfi því allir græða.

Leiðarahöfundur lætur þess reyndar ekki getið að fólk er að græða "mismikið" - svo vægt sé til orða tekið.

Nýjasta dæmið er Straumshneykslið. Þar ætluðu stjórnendur að græða allt að tíu milljarða króna fyrir vinnu sína. Ofan á launin sín. 

Forstjórinn hefur að mér skilst fjórar milljónir í mánaðarlaun.

Gróði íslensks almennings er svo auðvitað tapið af frjálshyggjutilrauninni þegar hún misheppnast.

Nýjasta dæmið um það er Icesave. Þar er alveg dýrlega háum tapupphæðum velt yfir á hin breiðu bök okkar sem aldrei fengum neina bónusa eða kaupauka - nema tapið af öllum gróðanum.

Við verðum að axla ábyrgð og megum aldrei gleyma því að

kerfið er gott

því allir græða.

Myndin er frá Hólum í Hjaltadal.

Athugasemdir

[Georg P Sveinbjörnsson, 21.8.2009 kl. 13:54]

Frasinn skammsýni um að græðgi sé góð er ekki dauður úr öllum æðum og þessi leiðari undarleg skrif.

[Sigurður Þórðarson, 23.8.2009 kl. 00:33]

Fréttablaðið er ekki ljós lífs míns. Frjálshyggjan, upphafning græðginnar eins og ég skynja hana er ekki  draumaland heldur  óguðlegt "fenjasvæði siðblindunnar".-