Minningar

Óvissufræðingurinn Nassim Nicholas Taleb sem ég skrifaði um hér á blogginu fyrir skömmu er með skemmtilegar pælingar um minningar í bók sinni um svarta svaninn.

Taleb segir að þegar við minnumst atburðar í fyrsta skipti beinist minningin að atburðinum.

Næsta minning um atburðinn markast af því hvernig við minntumst hans þar á undan.

Og svo framvegis.

Við skrifum atburðinn upp á nýtt í hvert sinn sem við minnumst hans með hliðsjón af síðustu minningu okkar um hann.

Atburðurinn er því sífellt að umskrifast í minningum okkar.

Við minnumst í raun ekki atburðarins heldur þess hvernig við minntumst hans síðast.

Minningar eru því mjög umdeilanlegar heimildir.

Það þarf þó ekkert að rýra gildi þeirra.

Í tilefni Akureyrarvöku birti ég mynd af einu af skáldahúsum bæjarins, Sigurhæðum.

Athugasemdir

[Hólmfríður Pétursdóttir, 30.8.2009 kl. 13:53]

Mikið er ég sammála Taleb.

[Hólmfríður Pétursdóttir, 30.8.2009 kl. 14:56]

Allt í einu mundi ég að ég las ekki alls fyrir löngu grein um hvernig upprifjun minninga er notuð við meðferð á sárum á sálinni t.d. eftir stríð og aðra reynslu sem mörgum reynist erfitt að komast yfir.

Reynt er að gera upplifunina af upprifjuninni góða og svo er þetta endurtekið þar til dregur úr einkennunum eða þau hverfa.

Sjálf hef ég tekið skáldið á Sigurhæðum mér til fyrirmyndar og skrifað sögukafla af sjálfri mér á blogið í sumar, þegar ég var bundin við stól í tvo mánuði.

Ég finn að það hefur verið hollt, þó sumum kunni að finnast hreinskilnin full mikil, svona fyrir hvern sem lesa vill.

Ég sannfærðist enn betur um að Guð hefur alltaf gengið með mér, eða borið mig áfram.

[Jón Steinar Ragnarsson, 30.8.2009 kl. 20:37]

Og er eitthvað point í þessari pælingu, eða eru menn bara að reyna að vera heimspekilegir?

Svona Ipse Dixiter óbrigðult, sérstaklega þegar hægt er að flíka erlendum nöfnum. Nú eða almættinu sjálfu. Þú ættir jú að vera á heimavelli í þessu. Pointið er kannski aukaatriði þar. Með fullri virðingu. 

[Svavar Alfreð Jónsson, 30.8.2009 kl. 21:13]

Ég er bara að reyna að vera heimspekilegur, Jón Steinar og flíka erlendum pointum eins og Ipse Dixiter.