Fjölmiðlar án blaðamennsku

 

Í morgunútvarpinu hlustaði ég á Jónas Kristjánsson harðneita því  að fjölmiðlar hefðu brugðist í hruninu.

Mér skildist á Jónasi að fjölmiðlarnir hefðu bara staðið sig ljómandi vel þegar Ísland fór á hvínandi hausinn.

Þeir hefðu bara ekki haft hugmynd um að landið væri að fara á hvínandi hausinn.

Og hvernig áttu fjölmiðlarnir líka að vita það?

Þar að auki væri rannsóknarblaðamennska svo ofboðslega óvinsæl á Íslandi að það væri varla hægt að stunda hana og því ekki við því að búast að íslenskir fjölmiðlar hefðu gert mikið af þannig löguðu.

Ég held að það sem Jónas kallar "rannsóknarblaðamennsku" sé yfirleitt bara kallað "blaðamennska" í öðrum löndum.

Ég held að Jónas hafi verið að segja okkur að ekki hafi verið hægt að búast við miklu af íslenskum fjölmiðlum í aðdragandi hrunsins.

Þeir séu ágætir en þar sé bara ekki stunduð blaðamennska.

Því miður.

Myndin er úr betri stofunni í gamla bænum á Burstafelli í Vopnafirði.

Athugasemdir

[Yrsa Horn Helgadottir (IP-tala skráð) 2.9.2009 kl. 07:30]

Góður punktur Svavar. Fjölmiðlar þurfa að taka sjálfa sig í meiri naflaskoðun og fjalla meira um sitt hlutverk í þessu gangverki. Við þekkjum öll hvert  þeirra hlutverk á að vera og verðum að geta treyst þeim og upplýsingum frá þeim til að geta tekið afstöðu. Sennilega eiga þeir bara enga sérfræðinga í ákveðnum málaflokkum sem kemur niður á þessari sk rannsóknarblaðamennsku. Eigðu góðan dag, YHH

[Oddur (IP-tala skráð) 2.9.2009 kl. 16:31]

Jónas er þá væntanlega búinn að gleyma umfjölluninni um kjánana dönsku sem skrifuðu um yfirvofandi hrun bankakerfisins á Íslandi.  Já og líka sendinefndina m.a. af íslenskum fjölmiðlamönnum, sem var gerð út til að leiðrétta þessa fyrrnefndu kjána.