Mogginn

 

Að sjálfsögðu setur maður spurningamerki við það uppátæki að gera einn mesta og umdeildasta áhrifamann landsins að ritstjóra eins helsta, elsta og virðulegasta fjölmiðils landsins.

Það er óneitanlega dálítið berlúskónískt.

Óskar Magnússon, Þorsteinn Már og aðrir eigendur Moggans eru að taka töluverðan séns.

Gallarnir við Davíð sem ritstjóra eru augljósir.

Hann er einn af aðstandendum sýningarinnar sem á að fara að gagnrýna.

Fáir hafa verið lengur á sviðinu en hann.

Hinu má ekki gleyma að Davíð hefur líka kosti í djobbið. Hann þekkir innviði íslensks samfélags betur en flestir aðrir. Og hann er einn af fáum áhrifamönnum sem hafa þorað að hamast í auðmönnum. Alla vega sumum þeirra. Svo er hann ágætur penni og á auðvelt með að ná sambandi við þjóðina.

Davíð þarf samt að hafa mikið fyrir því að sanna sig í þessu verkefni og þar reynir kannski ekki síður á samstarfsmenn hans.

Og samstarfshæfileika Davíðs.

Ég óska honum og Morgunblaðinu alls hins besta og held að það getið orðið spennandi og hollt að lesa blaðið með morgunkaffinu næstu mánuðina.

Því þrátt fyrir allt held ég að það sé hættuminna að menn með skoðanir ritstýri blöðum en að auðhringir eigi þau.

Myndin er af haustlaufi sem ég sá í Naustaborgum í dag.

 

Athugasemdir

[Grefillinn Sjálfur - Koma svo! (IP-tala skráð) 25.9.2009 kl. 16:00]

Mér finnst allt of mikið gert úr því að Davíð sé orðinn ritsjóri Moggans og skil  ekki öll þessi læti út af því. Eigum við bara ekki að sjá hvernig manninum gengur í nýja starfinu og óska honum heilla eins og við myndum jafnan gera ef einhver annar ætti í hlut?

Flott mynd í dag. Ég er mikið fyrir mikla og sterka náttúruliti þótt ég eigi að vera litblindur samkvæmt litlblinduprófum (hef aldrei skilið hvernig sú blinda virkar).

Láttu endilega vita þegar þú ert búinn að koma þér fyrir á Photobucket. Hlakka til að geta rennt yfir allt myndasafnið á slíkum stað og er viss um að það á eftir að vekja mikla athygli úti í heimi ef þú skilar verkinu vel af þér (sem ég er ekki í vafa um).

Annars hef ég tekið eftir nokkrum bloggum undanfarið þar sem fólk sem hefur ljósmyndun fyrir áhugamál gerir eins og þú og skreytir bloggið sitt með eigin myndum úr sinni sveit. Hér er dæmi:http://vestan.blogspot.com/2009/09/ertu-grinast.html

Sumir virðast hafa einstakt auga fyrir því að fanga fegurð íslenskra náttúru á myndir og persónulega held ég að fátt laði ferðafólk meira til landsins en fagrar myndir af fegurð þess.

Þess vegna væri gaman að sjá alla góða íslenska náttúruljósmyndara setja upp sýningar á vefum eins og photobucket, Flickr og fleirum. Það myndi örugglega hjálpa ferðaþjónustunni í landinu - og þeim sjálfum því mér skilst að það sé talsverð "commercial" eftirspurn eftir flottum vefmyndum og að margir séu að búa sér til góðan bisness á þeim.