Norska kanínan

Í kvöld sá ég norskan stjórnmálamann bjóða Íslendingum aðstoð í Ísklafamálinu.

Íslendingar hafa kvartað sárlega undan því að vera einir og vinalausir í þessari deilu við nýlenduveldin gömlu.

Yfirgefnir í veröldinni.

Og hver urðu fyrstu viðbrögð stjórnvalda?

Félagsmálaráðherrann íslenski kallaði þetta tilboð norskan kanínuhatt.

Stundum er sagt að með ákveðna tegund af vinum þurfi menn ekki óvini.

Þessu hefur nú verið snúið við.

Með ákveðna tegund af óvinum - og þá á ég við Breta, Hollendinga, AGS og síðast en ekki síst ESB - þurfa íslensk stjórnvöld ekki vini.

Eða vilja þá ekki. 

Ég hef áður lýst aðdáun minni á Ögmundi Jónassyni. Ekki hefur hún minnkað eftir atburði dagsins.

En leyndarhyggjan og lygin í kringum Ísklafann heldur áfram.

Hin síendurteknu ósannindi um málið eru ótrúleg framkoma við þjóðina.

Myndin: Skiltið vísar á nyrsta odda landsins. Megi blekkingar og spuni stjórnvalda um Icesave fara þangað og niður.

 

Athugasemdir

[Gísli Baldvinsson (IP-tala skráð) 30.9.2009 kl. 23:21]

Matt:5:5 í orði sem borði.

[Páll A. Þorgeirsson (IP-tala skráð) 1.10.2009 kl. 12:36]

Tek undir orð þín Svavar    ..... Hin síendurteknu ósannindin um málið eru ótrúleg framkoma við þjóðina.

Sumir stjórnmálamenn virðast hafa "ráð undir rifi hverju", sérstaklega þegar hagræða þarf sannleikanum.  Ég ber virðingu fyrir Ögmundi, þrátt fyrir að ég sé ekki alltaf á sama máli og hann í pólitík þá tel ég að hann taka á þessum málum af mestri skynsemi stjórnarliða í dag, þar ræður ekki bara stóllinn.  Svar hans við þeirri spurningu hvort hann sé að forðast ráðherrastólinn vegna erfiðra verkefna framundan nægir mér.

Það var döpur sjón sem blasti við mér fyrir nokkrum árum þegar ég átti leið framhjá kríuvarpinu við Rif.  Tugir fugla dauðir og hálfdauðir á veginum.  Þar hafði einhver ekið yfir fuglinn og greinilega án þess að slá mikið af hraðanum og huga að afleiðingunum því slóðin var löng.  Útlendingarnir sem með mér voru sátu hljóðir.  Mér finnst íslenskir stjórnarliðar vaða dálítið mikið áfram án þess að huga að afleiðingunum fyrir þjóðina og skoða alla möguleika.

[Sigurður Þórðarson, 1.10.2009 kl. 16:02]

Skarpur pistill að venju.

[Finnur Bárðarson, 1.10.2009 kl. 16:25]

Viðkomandi hefði geta sagt. "Við skulum endilega skoða þetta mál nánar, sjá hvað er til í því", svona sem vott um áhuga og almenna kurteisi, þó ég hafi nú litla trú á þessu. En það er leiðinlegur hroki í nánast öllum stjórnmálamönnum.

[Sigurður Sveinsson, 1.10.2009 kl. 17:00]

Ég hef lengi treyst þeim vopnabræðrum, Ögmundi og Steingrími, betur en öðrum stjórnmálamönnum. Traust mitt er enn óskorað á Ögmundi og reyndar meira nú en nokkru sinni. Ég gafst strax upp á Steingrími eftir kosningarnar. Hann hefur margítrekað gengið á bak orða sinna fyrir kosningarnar. Rýtingsstunga SJS í gær er eitthvað það lágkúrulegasta sem ég heyrt í íslenskri pólitík. Ögmundur er að mati hans þreyttur og treystir sér ekki í hin erfiðu verkefni í heilbrigðismálunum. Steingrímur lýgur gegn betri vitund. Það er honum jafnauðvelt eins og að hafa orðið viðskila við samvisku sína.

[Ragnar Gunnlaugsson, 1.10.2009 kl. 17:22]

Nú er ég orðinn sammála Sigurði Sveinssyni.

[Jón Óskarsson (IP-tala skráð) 1.10.2009 kl. 20:27]

Þetta með Sigmund og Þórhall var einfaldlega að þeir lásu gamla frétt en ekki til enda. 

Það er gömul frétt að norski framsóknarmaðurinn vill lána peninga til okkar en bæði norski forsætisráðherrann og fjármálaráðherrann og flokkar þeirra vilja ekki ljá máls á neinu slíku.

http://kaninka.net/stefan/2009/10/01/voru-%C3%BEeir-a%C3%B0-lesa-moggavefinn/

http://www.mbl.is/mm/frettir/erlent/2009/08/14/stjornin_gagnrynd_fyrir_horku/

Tal um óvini og höfnun á vinum er ekki maklegt í ljósi þessa.

[Svavar Alfreð Jónsson, 1.10.2009 kl. 20:33]

Mikill er máttur Moggans, Jón.