Existensíalisminn og sauðkindin

Tengslin milli danska heimspekingsins og guðfræðingsins Sören Kierkegaard annars vegar og íslensku sauðkindarinnar hins vegar liggja ekki í augum uppi.

Þau eru þó til staðar því Kierkegaard hefði aldrei orðið sá sem hann var ef hann hefði ekki getað lært og helgað sig fræðunum. Það hefði hann ekki getað gert nema vegna þess að hann átti sæmilega stöndugan pabba. Og pabbi Kierkegaards varð ríkur á því að höndla með íslenskar vörur, þar á meðal ull.

Þetta kemur fram í ævisögu Kierkegaards, SAK, eftir Joakim Garff, sem ég hef verið að glugga í annað slagið (ISBN 87-12-04208-0).

Vel má færa fyrir því rök að upphaf tilvistarstefnunnar sé í kindinni.

En Íslands er oftar getið í þessari stórmerkilegu bók.

Þar er til dæmis sagt frá Grími Thomsen og ritgerð hans um Byron lávarð.

Og síðast en ekki síst kemur við söguna Magnús nokkur Eiríksson, "den kaotiske teolog" eins og hann er nefndur í bókinni, sem útleggst sennilega óreiðuguðfræðingur, en hann gaf út rit með afar sérkennilegum titlum og allítarlegum.

Árið 1846 gaf Magnús út ritið "Dr. H. Martensens trykte moralske Paragrapher, eller det saakaldte "Grundrids til Moralphilosophiens System af Dr. Hans Martensen", i dets forvirrede, idealistisk-metaphysiske og phantasisk-speculative, Religion og Christendom undergravende, fatalistiske, pantheistiske og selvforguderske Væsen".  

Magnús var hreint ekki búinn að ljúka sér af og fjórum árum síðar sendi hann frá sér annað rit "med en for islændingen karakteristiskt langtitel", svo notað sé orðfæri Garffs. Það hét "Er Troen et Paradox og "i Kraft af det Absurde"? et Spörgsmaal foranlediget ved "Frygt og Bæven, af Johannes de silentio", besvaret ved Hjælp af en Troes-Ridders fortrolige Meddelelser, til fælles Opbyggelse for Jöder, Christne og Muhamedanere, af bemeldte Troers-Ridder Broder Theophilus Nicolaus".

Einhvern tímann heyrði ég að titlar á bókum ættu að lýsa efni þeirra. Það var af þeim sökum sem mig minnir að Þórarinn Eldjárn valdi "Snjóflóð og skriðuföll" besta titilinn því sú bók fjallar einmitt um snjóflóð og skriðuföll.

Varla verður lengra gengið í þessum skóla titlagerðar en hjá Magnúsi mínum Eiríkssyni.

Til heiðurs óreiðuguðfræðingnum Magnúsi Eiríkssyni og öðrum lútherönum set ég hér neðst skemmtilegan söng sem ég fékk nýlega ábendingu um. (Þarf að klikka á Watch on You Tube.)

Myndin: Svona er umhorfs í Kjarnaskógi þessa dagana.

Athugasemdir

[Jón Steinar Ragnarsson, 5.10.2009 kl. 15:51]

Skemmtileg grein. Magnús þessi hefur svosem ekkert verið mikið öðruvísi hvað munnræpuna snertir, en kollegar hans alla tíð síðan, Gott að sjá að þú hefur húmor fyrir ruglinu.

Myndbandið er dottið út.

[Svavar Alfreð Jónsson, 5.10.2009 kl. 15:56]

Ef þú klikkar á Watch on You Tube sérðu myndbandið.

[Kristinn Jens Sigurþórsson (IP-tala skráð) 5.10.2009 kl. 21:10]

Takk fyrir þennan góða pistil og myndbandið, sem ég var búinn að skoða áður. Óreiða og óvissa hafa einmitt verið mér hugleikin upp á síðkastið, en ég var að ljúka við að lesa bók Atla Harðarsonar, sem hann skrifar til varnar óvissunni, auk þess sem ein prédikun minna á tru.is ber nafnið óreiðuþol: http://www.tru.is/sida/hofundar/kristinn_jens_sigurthorsson

Maður þyrfti kannski að leggjast í að lesa óreiðuguðfræðinginn Magnús Eiríksson? Hvernig er það annars, þurfa óreiðuguðfræðingar nokkuð að borga skuldir óreiðumanna?