Vondir dagar

 

Ég rakst á þennan flotta texta um vondu dagana - en þá þekkjum við öll.

Vondir dagar, þú veist hvernig þeir eru. Þá fer allt úrskeiðis. Þá sérðu ekkert nema svartnætti. Og það sem er verst, þú heldur að þannig haldi það áfram. Vondir dagar eru lengi að líða. Þeir eru lengstir allra daga.

Allir menn eiga vonda daga. Hvað getur maður gert á þeim? Á vondum dögum verður þú að vera þolinmóður, mjög þolinmóður. Þolinmæði er mikil dyggð og maður er alla ævina að læra hana. Í nútímanum á allt að ganga svo hratt fyrir sig. Allar óskir eiga að rætast tafarlaust. Með því einu að ýta á takkann. En lífið er ekki vél sem framleiðir ekkert nema góða daga.

Það eru til góðir dagar og vondir dagar. Góðir dagar líða. Það veist þú og þér finnst það skelfileg tilhugsun. En vondu dagarnir líða líka. Hvers vegna leiðir þú hugann ekki að því og af hverju er það þér ekki huggun?

Höfundur þessara hugleiðinga heitir Phil Bosmans og er belgískur prestur.

Myndin er haustmynd tekin handan og framan Akureyrar.

Athugasemdir

[Sigurður Þór Guðjónsson, 15.10.2009 kl. 23:20]

En hann gleymir einu: Eftir vonda daga koma stundum enn verri dagar!

[, 16.10.2009 kl. 00:11]

Falleg mynd og góð hugleiðing.

[Svavar Alfreð Jónsson, 16.10.2009 kl. 08:06]

Meira að segja verri dagarnir líða líka, Sigurður.

[Jón Steinar Ragnarsson, 16.10.2009 kl. 08:56]

Er sírann farinn að boða afstæðishyggju?  Ja hérna hér. Nú er fokið í flest skjól.

[Sigrún Aðalsteinsdóttir, 16.10.2009 kl. 23:53]

Vondir dagar, góðir dagar, þetta hverfur allt út í algleymið og samkvæmt rannsóknum virðist fólk alltaf muna góðu dagana.  Eða var ekki alltaf gott veður í þinni æsku samkvæmt þínum minningum.  Ef það var vont veður gerðist eitthvað ótrúlega skemmtilegt:  Allir drukku saman heitt kakó og borðuðu nýsteiktar kleinur og úti var verður alveg brjálað.  En það sem lifir í minningunni var þetta notalega.

Frábær mynd, það er fallegt í Eyjafirði.