Við sáum það koma eftir á

 

Nú þykjast allir hafa varað við hruninu.

Ef mark er takandi á sumum fjölmiðlamönnum gerðu íslenskir fjölmiðlar fátt annað fyrir hrun en að vara okkur við ástandinu, greina efnahagsbóluna og krítísera útrásina.

En sannleikurinn er auðvitað sá að sárafáir sáu banka- og efnahagsghrunið fyrir.

Og þessir sárafáu voru gjarnan stimplaðir öfundsjúkir sérvitringar og svartsýnir nöldurseggir. Gamaldags lið sem ekki þorði að taka sénsa. Úrtölumenn.

Þeir voru á hinn bóginn allnokkrir sem voru krítískir á íslenskt þjóðfélag, þá hugmyndafræði sem hér var ríkjandi og andann í landinu.

Ég var að blaða í gamalli möppu og fann hugvekju sem ég flutti úti í Ólafsfirði á þjóðhátíð árið 1989, fyrir tuttugu árum.

Aldrei átti ég von á þessu hruni á Íslandi en segi þó meðal annars þetta í þessari gömlu ræðu:

Með sanni má segja að stórhugur sé eitt af megineinkennum tuttugustu aldar Íslendinga. Við flýtum okkur inn í nýja tíma og hugsum bæði hátt og stórt. Við erum það stórhuga, að við erum eiginlega orðin of stór fyrir okkur sjálf og flýtum okkur það mikið, að við erum komin fram úr okkur sjálfum. Við erum það stórhuga að eyjan okkar litla rúmar ekki hugsun okkar. Og flýtirinn á öllu saman er þvílíkur, að við höfum ekki efni á að framfleyta okkur lengur, heldur þurfum við að taka lán hjá erlendum bönkum, við framvísum hugsunarlaust himinháum reikningum til framtíðarinnar, til komandi kynslóða.

Ótalmargir hafa gagnrýnt  það samsæri græðginnar gegn manneskjunni sem átti sér stað á Íslandi fyrir hrunið.

Það þýðir þó ekki að þeir hafi séð hrunið fyrir eða varað við því.

Nú eru reyndar að þróast algjörlega ný vísindi á Íslandi. Þau ganga út á að ritskýra eigin orð þannig að þar hafi verið varað við hruninu - að minnsta kosti undir rós. Þannig hafi viðkomandi alltaf vitað að svona hlyti að fara.

Má binda miklar vonir við framfarir í þessum vísindum og mun ábyggilega ekki líða langur tími uns þjóðin gerir sér grein fyrir að annar hver Íslendingur reyndist hafa séð allt þetta fyrir.

Myndin: Hann var fallegur í dag, Eyjafjörðurinn.

 

Athugasemdir

[, 25.10.2009 kl. 23:07]

Já þetta er sannarlega falleg mynd af Eyjafirði. Auðvitað sáu allir hrunið fyrir - það bara trúði enginn sjálfum sér

[Sigurður Þórðarson, 26.10.2009 kl. 19:40]

 Stór hluti áhrifavalda í efnahagslífi Íslands voru og eru fíklar.

Það er með ólíkindum hvað stjórnvöld voru meðvirk. Getur  verið að fjármögnun prófkjöra hafi átt þátt í því?