Vill einhver elska 49 ára gamlan mann?

 

49 ára afmælisdagur telst venjulega ekki til stórafmæla. Engu að síður finnst mér merkilegt að verða 49.

Þegar ég varð 48 átti ég svo sem ekki von á öðru en að verða 48 þótt maður geti aldrei verið öruggur um neitt. Eftir að ég varð 48 greindist ég með sjúkdóm og 49 ára afmælisdagurinn hvarf í þokureyk óvissunnar.

En allt gekk vel og nú er ég meira að segja í betra ástandi en þegar ég varð 48.

Ég hafði því góða ástæðu til að fagna í dag og vera þakklátur.

Ég fékk margar góðar gjafir. Samstarfskona mín í kirkjunni var svo vinsamleg að gefa mér tvær flöskur af sérinnfluttu pylsusinnepi frá Noregi. Besta sinnep í heimi.

Ég fékk yndislega geisladiska með færeyskum dægurlögum á íslensku og íslenskum slögurum á færeysku.

Mamma og pabbi gáfu mér bók um Jökulsárgljúfur eftir fyrsta landvörðinn í Þjóðgarðinum þar. Með gönguleiðum og vönduðu landakorti.

Vinkona mín færði mér æðislegan uppþvottabursta ásamt borðtusku í stíl.

Svo fékk ég laxaflugur hnýttar af Kalla mági en ég á enn eftir að veiða fyrsta flugulaxinn minn.

Síðast en ekki síst fékk ég heilan helling af góðum kveðjum á Facebook.

Ég tók mér frí eftir hádegið, sletti í form og smurði snittur. Þeir sem glöddu gamla manninn með heimsóknum fóru ekki svangir heim.

Líkurnar á því að ég nái 50 ára aldrinum hafa aukist þótt ekkert sé "fast í hendi" svo notaður sé frasi frá stjórnmálamönnunum og því sé "haldið til haga" svo notaður sé annar frasi úr sömu herbúðum.

Alla vega er styttra í öldina hálfu í dag en það var í gær.

Ég tók á móti 49 ára afmælisdeginum í auðmýkt.

Í tilefni dagsins birti ég mynd sem ég tók nýlega í Vatnsdalnum, þeim dýrðarstað.

Athugasemdir

[Sigurbjörg Eiríksdóttir, 29.10.2009 kl. 23:08]

Gaman að heyra..Gamli segir þú..Ég er rúmlega sextug og mér finnst ég ung. Svolítið rugluð eflaust. Gangi þér allt í haginn í þínu stríði vinur.

[Hólmfríður Bjarnadóttir, 29.10.2009 kl. 23:18]

Til hamingju með afmælið ungi maður. Ég verð 65 ára eftir áramótin og tel mig vera á besta aldri til að gera hvað sem er.

[Jóna Kolbrún Garðarsdóttir, 30.10.2009 kl. 00:07]

49 er góður aldur.  Til hamingju með afmælið. 

[Þráinn Jökull Elísson, 30.10.2009 kl. 03:54]

Til hamingju með daginn vinur. Þú ert alveg að ná mér. Þú nefnir geisladisk með færeyskum lögum á íslensku og omvendt. Ég bjó í Færeyjum í ellefu dásamleg ár. Norðureyingurinn hann Jógvan ( ó er borið fram e ) litli  Hansen er að gera góða hluti. Bestu kveðjur úr Grundarfirði.

[Þórhallur Heimisson (IP-tala skráð) 30.10.2009 kl. 08:09]

Til hamingju með daginn félagi - ég næ þér á næsta ári

[Islendingur (IP-tala skráð) 30.10.2009 kl. 09:30]

Til hamingju med daginn Svavar og ekki finst mer thetta har aldur :-)

Eg er 71 og mer finnst eg ekki vera gamall :-)

Bestu kvedjur til thin og thinna

[Anna Dóra Garðarsdóttir (IP-tala skráð) 30.10.2009 kl. 10:41]

Til hamingju með afmælið og gangi þér vel. Ég er oft búin að skemmta mér vel af blogginu þínu.. takk takk

[Heimir Lárusson Fjeldsted, 30.10.2009 kl. 15:34]

Vill einhver elska 49 ára gamlan mann?

Til hamingju með daginn.

Er ekki varasamt að spyrja svona í ljósi stöðu fyrirspyrjanda?

[josira, 30.10.2009 kl. 18:21]

Sæll Svavar Alfreð, ég kem hér óvænt inná þessa fallegu og skemmtilegu síðu og langar mig að óska þér til hamingju með afmælisdaginn í gær. Megi lán og lífssins lukka fylgja þér og þínum um ókomin ár.

[, 30.10.2009 kl. 20:14]

49 ára er mjög góður aldur - kannast svo vel við það

[Jón Ellert (IP-tala skráð) 30.10.2009 kl. 20:51]

Sæll Svavar Alli - Þakka þér allt gamalt og gott og bið að heilsa þínu góða fólki. Til hamingju með afmælið þú ungi maður - veit að þú munt yngjast með hverju árinu - eftir að hafa fengið að gjöf viðvörun og milkilvæga reynslu - kv. jel

[Magnús Geir Guðmundsson, 31.10.2009 kl. 21:34]

Síðbúin afmæliskveðja til þín Svavar, þið skólabræðurnir þú og Hemmi eruð nánast jafngamlir, hann á 15. nóv.Ég held að hann hafi sjáldan eða aldrei verið hressari nú rétt við sín ´tímamót!

[þórunn S. Ólafsdóttir (IP-tala skráð) 2.11.2009 kl. 17:44]

Hvað er svona ungur drengur að gera hér, var mér hugsað, þegar við hittumst fyrst í Hjarta-leikfiminni. Enn ertu sami ungi drengurinn og til hamingju með það !