Ég er langsætastur

Við vorum að vigta okkur í búningsklefum Sundlaugar Akureyrar, bosmamiklir alvörukarlmenn, ekki skornir við öxl eftir jólaát, þorrablót og bolludag, loksins þegar við dröttuðumst í sundið eftir þær tarnir - enda kominn sprengidagur.

Menn heyrðust taka andköf þegar stafræn vogin birti þeim nöturlegan sannleikann.

Einn vildi ekki á vigtina. Kvaðst ekkert hafa með það að gera. Hann væri ánægður með sig eins og hann væri.

"Þegar ég var lítill sagði mamma mín mér að ég væri fallegur drengur. Ég sé enga ástæðu til að draga það í efa. Mamma sagði alltaf satt og hafði alltaf rétt fyrir sér," sagði hann skælbrosandi og smellti teygjunni á nærhaldinu yfir neðstu ístruna á sér.

Og tilfellið var að maðurinn var miklu myndarlegri en við hinir sem þræddum á okkur larfana, niðurbrotnir og eyðilagðir og vorum að íhuga hvort við ættum að þora að lúskrast út á meðal fólks.

Athugasemdir

[Heimir Lárusson Fjeldsted, 5.2.2008 kl. 17:52]

Mamma var líka ánægð með mig......framan af ævinni........

[bumba (IP-tala skráð) 5.2.2008 kl. 20:52]

Heheheh, frábært, ég skil þig mjög vel, það eru alltaf fitusafnandi jól hjá mér allt árið um kring. birti af mér mynd þegar ég er búinn að losa mig við 55 kíló, 5 þegar farin. Með beztu kveðju.

[Brattur, 5.2.2008 kl. 23:32]

... ég er búinn að uppgötva að þegar ég borða meira, en reglulega... þá léttist ég, heldur en þegar ég borða minna og á hlaupum... og svo er það kaffið... sleppa því og maður verður léttari... líka í skapi...