Langi frjádagur

Það er góður siður að lesa Passíusálmana alla á föstudeginum langa og þeim kirkjum fjölgar ár frá ári sem bjóða upp á slíkan lestur.

Mörg undanfarin ár hafa Passíusálmarnir t. d. verið lesnir í Akureyrarkirkju og oftast hefur Þráinn Karlsson, leikari, verið þar í forsvari.

Í dag fær hann til liðs við sig kollega sína í Leikfélagi Akureyrar. Boðið er upp á kaffisopa í forkirkju og tónlist á heila tímanum.

Ég las fyrsta sálminn og inngang séra Hallgríms að sálmum sínum. Þar segir:

"Umþenking guðrækileg herrans Jesú pínu og dauða er vissulega dýrmæt, og hver sig langvaranlega gefur til þeirrar umþenkingar og ber jafnan Jesú Kristí píslarminning í sínu hjarta, sá geymir hinn dýrasta hlut."

Í kvöld er í kirkjunni Kyrrðarstund við krossinn. Þar verður falleg tónlist og píslarsagan lesin. Einnig flytur Þráinn sjö orð Krists af krossinum.

Margt er hægt að gera á föstudeginum langa - annað en að spila bingó.

Athugasemdir

[. (IP-tala skráð) 21.3.2008 kl. 22:44]

Gleðilega páska.

Ég var nú reyndar að spá í því hvort það væri viðeigandi að óska gleðilegra páska... er þetta ekki dálítill sorgartími fyrir kristna?

Bestu kveðjur,
Jakob

[Aida., 21.3.2008 kl. 22:49]

mjög sammála þér, þó finnst mér að við ættum að lesa hann oftar og jafnt yfir árið. Hallgrím Péturson meina ég.

Mér finnst hann minna okkur á hversu mjög dýrmæt iðrunin er fyrir hinn kristna einstklíng,.

[Svavar Alfreð Jónsson, 21.3.2008 kl. 23:07]

Jakob, páskarnir byrja ekki fyrr en á páskadag og þá getur maður sagt "gleðilega páska!" alveg eins og kveðjan "gleðileg jól!" hefur sérstakan hljóm þegar búið er að hringja inn jólin kl. sex á aðfangadag eða "gleðilegt ár!" hljómar aldrei eins og á miðnætti á gamlárskvöld.

Það er samt ósköp notalegt finnst mér að vera óskað gleðilegra jóla þótt ekki séu komin jól eða gleðilegs árs í nánd áramóta.

Föstudagurinn langi er sorgardagur, litur hans svartur og þá er yfirleitt ekki kveikt á altariskertum kirknanna.

Er samt ekki söngurinn "Oh happy day" föstudagsinslangalag ("...when Jesus washed my sins away")?

[Snorri Magnússon, 22.3.2008 kl. 10:19]

Sjö orð krists af krossinum, í flutningi Þráins Karlssonar, kallaði upp í huga mér sýningu Baltasars Samper í Hallgrímskirkju en ég fór einmitt, rétt fyrir páska, til að skoða myndirnar hans.  Það var stórkostleg upplifun að standa frammi fyrir altarinu og horfa upp eftir olíumálverkinu sem er allt í senn ein mynd, sjö myndir og kross!  Myndin / krossinn myndi sóma sér vel sem altaristafla í kirkjunni, um ókomna tíð.

Ég ráðlegg öllum, sem tök hafa á, að koma við í Hallgrímskirkju og virða fyrir sér þetta stórkostlega listaverk.