Mótormessa

Næstkomandi sunnudag, 4. maí, bjóða Bílaklúbbur Akureyrar, Náttfari - Bifhjólasamtök Þingeyinga, Tían - Vélhjólaklúbbur Norðuramts og Akureyrarkirkja til mótormessu í Akureyrarkirkju.

Mótorhjólakappar aðstoða við messuna. Stúlknakór Akureyrarkirkju syngur og þeir Kristján Edelstein, Pétur Kristjánsson og Eyþór Ingi Jónsson, organisti, annast hljóðfæraslátt. Prestur er sr. Óskar Hafsteinn Óskarsson.

Eftir messuna, sem hefst kl. 11, verður efnt til hópkeyrslu.

Mótormessur tíðkast víða erlendis. T. d. fagna Hamborgarar á þessu ári aldarfjórðungsafmæli mótormessunnar.

Fyrir nokkrum árum var kunningi minn í mótormessu þar í borg. Var það mikið ævintýri. Biskup sá er þjónaði í messunni sat í fullum skrúða aftan á öflugu bifhjóli og var reiddur inn kirkjugólfið undir forspilinu. Kirkjan var þéttskipuð leðurklæddum mótorhjólaköppum. Fjöldi fólks sat á hjólum sínum á torgi fyrir utan kirkjuna en hægt var að hlusta á messuna þar í hátölurum.

Lét það ekki sitt eftir liggja í helgihaldinu og tók undir gloríuna með því að þenja hjól sín kröftuglega.

Með færslunni er lógó Mótormessunnar í Hamborg (Hamburger Motorrad Gottesdienst) fengið af heimasíðu hennar.

Athugasemdir

[Margrét Ingibjörg Lindquist, 3.5.2008 kl. 03:11]

Þetta er frábært framtak því við motorhjólafólk erum líka trúað...

[Kolbrún Stefánsdóttir, 3.5.2008 kl. 18:09]

Já Svavar. Það mun ekki af veita, að biðja þessu ágæta fólki blessunar og stilla það inn á guðsorðið. Mér er málið skylt því eldri dóttirin var að klára mótorhjólapróf og kom brunandi til mín í leðurgalla og á kolsvörtum fáki núna á 1. maí.  Hún er 39 ára og synir hennar báðir á torfæruhjólum og eiginmaðurinn líka. Ég er  nú með smá hnút í maganum þegar ég veit að þau eru að hjóla en veit líka að þau eru öll afar gætin og góðir ökumenn. Fagna þessu framtaki kirkjunnar. Góðar stundir Kolbrún.